MINISTER COOPER TA REUNÍ KU ASOSIASHON BANKARIO COLOMBIANO I KOMPANIA AMARILO NA COLOMBIA
MINISTERIO KONSERNÍ TRÁFIKO, TRANSPORTE I PLANIFIKASHON URBANO
MINISTER COOPER TA REUNÍ KU ASOSIASHON BANKARIO COLOMBIANO I KOMPANIA AMARILO NA COLOMBIA
PUBLIKÁ RIBA 17 MEI 2023
Willemstad – Minister Charles Cooper huntu ku su delegashon, a risibí un presentashon serka Sr. Jonathan Malagon, Presidente di Asosiashon Bankario Colombiano (alabes èks Minister di Bibienda di Colombia) tokante bibienda sosial for di e perspektiva bankario. Colombia komo pais ta den e kategoria number 1 segun Nashonnan Uní pa loke ta trata benta di kasnan sosial. E programa ‘Mi Casa Ya’ a kontribuí sigur na esaki.
Tambe, Minister Cooper a hasi un bishita i risibí presentashon serka e kompania Amarilo, ku ta un di e konstruktornan di mas grandi di Sur, i Sentro Amerika. Amarilo ta partisipá na e grupo VIP, kual ta e grupo ku ta atendé ku kasnan pa suidadanonan di entrada mas abou. Tambe Amarilo ta partisipá na e grupo VIS, kual ta e grupo pa kasnan sosial. Amarilo ta partsipá alabes den e programa di supsidio pa e pueblo por kumpra nan mes kas sosial.
Minister Cooper huntu ku su delegashon ta risibí un gran kantidat di informashon for di diferente angulo tokante kon e programa nashonal di Colombia pa kasnan sosial a duna Amarilo garantia pa por konstruí miles di kas. Minister Cooper a haña presentashon tambe spesifikamente di un proyekto pa un bario nobo ku yama ‘Cuidad Verde’ di 54,060 habitante.
Tur e informashon atkerí aki lo ta base pa plannan konkreto pa Kòrsou riba e tereno di bibienda pa pueblo.