Banco di Caribe ta kere den ‘Second Chance’
WILLEMSTAD: Resientemente a tuma lugá klousura di e proyekto ‘Second Chance’. E proyekto aki tabata un inisiativa di Stichting Passionistas den kolaborashon ku Sentro di Detenshon i Korekshon Kòrsou (SDKK). Banco di Caribe ta kontentu di por a forma parti di un proyekto sosial ku un impakto asina importante. E proyekto partikular aki a enfoká riba resosialisashon di klientenan di SDKK.
Durante e trayekto di ‘Second Chance’, un grupo di kliente di SDKK, di entre 19 pa 55 aña, por a partisipá den algun seshon di ‘coaching’, a risibí guia tokante di un potensial karera, informashon empresarial, entrenamentu pa traha presupuesto i diferente otro tayer práktiko ku por yuda krea un perspektiva mas positivo pa nan futuro na momento ku nan terminá e trayekto den e sentro di detenshon. E meta prinsipal ta pa nan por usa e abilidatnan nobo atkerí den futuro di manera ku nan por sigui riba e kaminda korekto.
Un ‘Second Chance’ pa un mihó bida:
E promé trayekto di ‘Second Chance’ a kuminsá ku un grupo di hende hòmber i e intenshon ta pa ehekutá 3 trayekto mas ku lo duna oportunidat pa hende muhé tambe por partisipá. Na klousura tur partisipante a risibí nan sertifikado i tabatin e oportunidat pa konta kon nan mes a eksperensiá e proyekto, e efektonan positivo ku esaki a trese pa nan i pa ekspresá nan gratitut.
Un bon futuro ta kuminsá na bo mes:
Aparte di e tim di SDKK i e partisipantenan, patrosinadónan ku a duna nan granito pa realisá e proyekto tambe a presensiá e klousura pa mira e resultado eksitoso di nan aporte. Banco di Caribe ta aploudí Stichting Passionistas pa krea oportunidat pa e grupo di detenidonan invertí nan tempu pa siña kosnan nobo i desaroyá nan mes. Un pabien na e partisipantenan pa nan entusiasmo i dedikashon na e proyekto. Banco di Caribe ta deseá tur partisipante hopi éksito i ku nan por sigui riba e bon kaminda pa alkansá nan máksimo potensial i krea un mihó futuro pa nan mes.
