HÓFINAN SER’I OTROBANDA A PASA PA DI DOS BUÈLTA DI E PREMIO  APPELTJES VAN ORANJE

Willemstad – Fundashon Ser’i Otrobanda (FSO) ta den kontienda pa gana e premio prestigioso Appeltjes van Oranje 2023. Ku e proyekto Hòfinan Ser’i Otrobanda, ‘community gardens’ den bario di Ser’i Otrobanda, e fundashon a logra pasa pa e di dos buèlta. Entre 31 di mei i 9 di yüni  próksimo por vota pa e proyekto pasa pa e últmo buèlta, ku chèns di bira un di e 10 nominadonan den Reino. Na final 3 organisashon den Reino por risibí un montante di €35,000 i un Appeltje van Oranje di bròns diseñá pa Prensès Beatrix.

Ademas di stimulá komementu salú, kosechá propio berdura i frutanan, redusí gastunan di kuminda e inisiativa di traha hòfinan komunitario ta konektá hende di diferente orígen i kultura den e bario. Habitantenan mes ta planta, kuida i kosechá den nan bario i por proveé pa nan propio konsumo. Un proyekto modelo pa otro barionan. E proyekto a organisá tambe diferente tayer di plantashon pa habitantenan planta den nan mes kurá apesar di tin un espasio chikí. Asina por mira ku tin diferente famia tin nan propio hòfi.

Dor di traha huntu den e hòfinan habitantenan ta konosé otro mas mihó, amistatnan nobo ta nanse i ta trese mas komprenshon i rèspèt entre e diferente kulturanan. Habitantenan ta mas uní, ta kuida otro, tin mas kòntròl sosial i ta kla pa yuda den otro proyektonan manera Clean-up Curacao i Cura Doet. Algu di aploudí imensamente.

Durante su 10 añanan di eksistensia FSO a organisá diferente proyekto pa e bario. Ku orguyo por bisa ku Ser’i Otrobanda ta un di e barionan di mas limpi di Kòrsou. Habitante i kompanianan di e bario mes ta kontribuí na mantenshon i limpiesa di nan bario. FSO tin diferente inisiativa mas pa e.o. konektá e habitantenan di bario. Asina FSO ke konstruí un brùg di bèrdat pa konektá, via Arubastraat, e parti ost i wèst di Ser’i Otrobanda. E inisiativa aki por mehorá i fasilitá mobilidat di e habitantenan pero alabes ta fungi komo ruta pa e.o. turistanan por disfrutá di e desaroyonan sosial i di arte den ámbos lado di Ser’i Otrobanda.

Ku e Appeltjes van Oranje 2023 Oranje Fonds ta premia inisiativanan ku ta kontribuí na un komunidat den kua niun hende ta keda ekskluí. E fundashon ta kontentu i orguyoso di por a pasa pa e di dos buèlta di e prestigioso premio aki. Ta un rekonosementu pa e trabou ku e ta hasi pa konektá habitantenan ku otro i ta stimulá relashon sosial den e bario.

Ku e premio di Appeltjes van Oranje 2023 Fundashon Ser’i Otrobanda ta spera di por invertí mas den e bario i konektá no solamente su habitantenan ku otro pero tambe atraé mas bishitante i turista kontribuyendo alabes na ekonomia di Kòrsou. FSO ta spera tambe ku e inisiativa aki ta haña mas rekonosementu i ta inspirá otro organisashon i provensia den Reino pa inisiá ku un proyekto similar.

E premio aki ta dependiente di voto, mas voto mas chèns e fundashon tin pa logra bira un di e 10 nominadonan ku chèns di forma parti di e 3 finalistanan. Un invitashon ta bai pa henter pueblo di Kòrsou vota pa Hòfinan Ser’i Otrobanda. Por vota entre 31 di mei i 9 di yuni. Pronto lo anunsiá via prensa i medianan sosial via kua link por vota.

Potret:Diferente potrèt di plantashon di hòfinan Ser’i Otrobanda, kuido di e hófi, kosecha i kushinamentu ku kosecha di  Hòfnan Ser’i Otrobanda