Kolegionan di supervishon finansiero a bishitá Hulanda
Kolegionan di supervishon finansiero a bishitá Hulanda
Den Haag – Di 22 te ku 24 di mei 2023 e Kolegionan di supervishon finansiero a hasi un bishita di trabou na Hulanda. Ei nan a papia ku Sekretario di Estado di Asuntunan Interior i Relashonnan den Reino, Sekretario di Estado di Finansa, miembronan di Eerste i Tweede Kamer, e Ministernan Plenipotensiario, Kontrolaria General (Algemene Rekenkamer) i Konseho di Estado (Raad van State). Durante e kòmbersashonnan a papia tokante di un trayekto pa yega na finansa públiko duradero i e prioridatnan prinsipal pa e paisnan i entidatnan públiko den Karibe relashoná ku esaki.
Despues di e añanan di krisis Kòrsou, Aruba i Sint Maarten ta konsentrando riba rekuperashon. Segun e kolegionan den e kuadro aki ta importante pa redusí e nivel di debe i oumentá e nivel di invershon. Esaki ta rekerí un surplus presupuestario for di aña 2024. Resientemente Kòrsou a logra bon resultado ku oumento di entrada di impuesto. Aruba i Sint Maarten tin un gran potenshal ainda pa logra esei. Esaki ta rekerí reforma i esfuerso ku determinashon pa mehorá kumplimento ku pagamentu (compliance) riba término kòrtiku. Kòntrol di gastu tambe ta sigui ta mes importante pa e tres paisnan. Invershonnan ku ta reforsá ekonomia lo yuda ku e rekuperashon. Ta pa e motibu ei e kolegionan ta rekomendá pa yega na un plan di invershon di mas aña. Un otro prioridat importante ta pa hasi e fondonan sosial duradero. Sin reforma, esakinan lo resultá inpagabel den futuro.
Pa e entidatnan públiko Boneiru, Sint Eustatius i Saba ta konta prioridatnan mas spesífiko. Maneho finansiero ta keda un punto di atenshon pa tur e islanan. Pa Saba esaki ta pa garantisá e nivel eksistente i pa Boneiru i Sint Eustatius ta pa e mehorashonnan ku nan ta trahando riba dje.
E retonan riba tereno di finansa públiko den e parti Karibense di Reino, i huntu ku esei e importansia di supervishon finansiero, ketu bai ta grandi. Poniendo prioridat na i fortalesiendo e relashonnan, e kolegionan ta spera di por kontribuí un bes mas na logra un finansa públiko sano i sostenibel den e próksimo periodo tambe.
Presidente Lidewijde Ongering i e miembronan ta mira bèk riba un biahe eksitoso. E kolegionan ta bishitá Hulanda un biaha kada dos aña. E bishita a tuma luga pa promé biaha bou di presidensia di Lidewijde Ongering. Ademas di e presidente, e kolegionan ta konsistí di e miembro riba proposishon di Hulanda Hans Hoogervorst, e miembro riba proposishon di Aruba Hellen van der Wal, e miembro riba proposishon di Boneiru, Sint Eustatius i Saba Glenn Thodé, e miembro riba proposishon di Sint Maarten Julisa Frans i e miembro riba proposishon di Kòrsou Gregory Damoen.
