80 EMPLEADO DI CRU TA SERTIFIKÁ PA POR DUNA PROMÉ ASISTENSHA

80 EMPLEADO DI CRU TA SERTIFIKÁ PA POR DUNA PROMÉ ASISTENSHA

 

Willemstad, 28 di Mei 2023 – Den kuadro di seguridat operashonal i preparashon di empleado pa por duna promé asistensha na momentu ku e nesesidat pa esaki surgi na nan boka di trabou, empleadonan di Curaçao Refinery Utilities (CRU) boluntariamente a sigui un kurso general di EHBO. Krus Korá a ofresé e kurso aki durante un periodo di dos luna. 

 

Curaçao Refinery Utilities (CRU) ta ofresé e kurso i ta sertifiká su empleadonan den e area di EHBO kontinuamente. Partisipashon na e kurso ta riba base boluntario. E kurso ta konsistí di un parti teorétiko i alabes entrenamentu intenso ku na final ta kualifiká e kursista pa por duna Promé Asistensha (First Aid), tantu den su boka di trabou na CRU komo pafó di kompania den komunidat i asta komo boluntario di Krus Korá. Kada dos aña empleadonan mester bolbe sertifiká pa asegurá ku nan konosementu i abilidat permanesé riba nivel. Un terser parti di personal di CRU ta sertifiká pa por ofresé promé asistensha pa medio di EHBO.

 

Manager di departmentu di Rekurso Humano di CRU, señor Benjamino ‘Benzo’ Goeloe, a enkurashá e empleadonan indikando den su diskurso ku “Mi ta konsiderá e kurso aki komo un di esnan mas importante na mundu. E ta duna bo e abilidat pa bo por salba bida di bo famia, bo koleganan i miembronan di nos komunidat. Nos ta sumamente agradesí na Krus Korá ku nan a kolaborá ku nos pa por ofresé e kurso di EHBO na empleadonan di CRU”.

 

General Manager di CRU, señor David de Haseth, di su parti tambe a gradisí e empleadonan pa nan partisipashon boluntario na e kurso di EHBO, ekspresando ku “Partisipá na e kurso aki ta yuda nos ta mihó prepará pa emergensha. Pero mas aun, e la demonstrá boso dedikashon i boso kompromiso pa duna sosten na kolega, pero tambe miembronan di nos komunidat na e momentu ku nan mester di yudansa i promé asistensha.”