Restrukturashon di transporte públiko na Kòrsou.

Presidente di Parlamento

Sra. America-Francisca

Wilheminaplein 4

Presente

 

Willemstad 7 yüni 2023

 

Tópiko: Restrukturashon di transporte públiko na Kòrsou.

 

Apresiabel sra. Presidente America-Francisca,

 

Un tópiko/punto ku ta kai bou di e ministerio di Tráfiko, Transporte i Planifikashon Urbano aki ta  transporte públiko. Durante e gobernashon anterior a kuminsá traha duru riba restrukturashon di transporte públiko pa asina  e por ta efektivo i  sirbi pueblo di Kòrsou ku ta hasi uso di transporte públiko mas mihó.  Tambe e lo sirbi otro gruponan den komunidat ku lo ke pa un òf otro rason bai hasi mas uso di transporte públiko.

 

Den e proyekto aki a traha riba un sistema di konekshon nobo i tambe ampliashon di e terminalnan di bus pa asina ei komunidat por hasi uso di esaki for di mas  kaminda ku no ta solamente  di Punda i Otrabanda. Entre otro a pensa pa  hasi  Barber, Julianadorp, Schottegatweg na altura di Postkantoor; puntonan kaminda lo por hasi ‘overstap’ esta kambia bus pa asina yega mas rápido na nan destinashon.

 

Nos lo ke sa di minister Cooper kon leu ta ku e plannan pa  kambio den e sistema di transporte públiko aki i tambe eventual kambionan ku a bini den e plannan eksistente.

 

Hasiendo uso di nos  derechi di pidi reunion  konforme artíkulo 33 di nos Reglamento di Órden nos ke yama un reunion di komishon  sentral  riba término kòrtiku den kual nos ta rekerí presensia di Minister Cooper pa deliberá riba e plan aki.

 

 

Danki di antemano,

 

Frakshon di PAR

 

 

 

 

Zita Jesus Leito MBA                                                                Quincy Girigorie

 

 

 

 

Ana Maria Pauletta