TUI TA RISIBÍ PÈRMIT DI KONSTRUKSHON PA EKSPANSHON DI OFISINA

Willemstad – Minister Charles Cooper huntu ku Servisio pa Planifikashon Urbano (ROP) a entregá un pèrmit di konstrukshon na TUI pa ekspanshon di nan ofisina ku un di dos piso.

 

Ofisina di TUI ta situá na W.F.G Mensing 96 na Schottegatweg Oost den Zeelandia. E desaroyo aki ta un invershon total di 4 mion florin i esaki lo dura 12 luna.

 

Durante di ehekushon di e proyekto di konstrukshon aki, lo tene debido kuenta ku eksigenshanan tèkniko di seguridat, i lo sòru pa bin ku 45 lugá di parkeo mas pa e ofisina.

 

E desaroyo aki ta kontribuí komo impulso ekonómiko grandi pa Kòrsou. E ta duna un impulso na ekonomia entre otro kreando 30 kupo di trabou na momento di e konstrukshon i 50 kupo nobo serka TUI ku pa 90% ta trahadó lokal.

    

Minister Charles Cooper ta hopi kontentu ku e desaroyonan aki, ya ku e ta ofresé pais un “boost” ekonómiko.