TA ENCURASHA SCOLNAN PA IMPLENTA DIGITALISACION DEN ENSEÑANSA PASOBRA E TA YUDA MUCHANAN HOPI

 

Leanne Tromp experto riba “digitale geletterdheid” na Scol Preparatorio Aurora

TA ENCURASHA SCOLNAN PA IMPLENTA DIGITALISACION DEN ENSEÑANSA PASOBRA E TA YUDA MUCHANAN HOPI

ORANJESTAD – Den cuadro di e proyecto di Edutech organisa pa Gobierno y Futura, scolnan tin e posibilidad pa participa y bin na remarca pa financiamento di materialnan innovativo pa scol. Scol Preparatorio Aurora ta un di e scolnan cu a resulta ganador y asina a ricibi fondo pa cumpli cu e meta pa pone borchinan digital den cada klas.

 

Leanne Tromp kende ta meastra di klas 1 y experto riba “digitale geletterdheid” na Scol Preparatorio Aurora, a splica cu prome cu el a finalisa su curso, e mester a indica un meta cu e lo kier a mira realisa na scol den cuadro di digitalisacion. Unabes cu a completa e curso, conhuntamente cu directora di e scol a cuminsa traha riba un plan pa mira con por realisa e meta aki. Inicialmente tabata conecta laptop na television cu waya HDMI y asina duna les haciendo uzo di Powerpoint cual e muchana tabata haya hopi interesante. Ademas, como parti di e meta pa sigui cu e procesonan di digitalisacion, e maestronan a cuminsa warda lesnan di idioma den Google Drive pa por reusa e siguiente añanan, cual tabata bayendo hopi bon.

 

Dia cu a tuma nota di e proyecto di Edutech cu Gobierno y Futura a lansa, a pensa dibiaha cu e ta un bon idea pa aplica pe. Ademas, como cu e scol ya caba tabatin un plan pa digitalisacion, a haci uzo di esaki y a yena e rekisitonan cual a conduci na e gran noticia despues di algun luna esta,  cu Scol Preparatorio Aurora a wordo scogi como un di e ganadornan. Awor cada cla tin un borchi digital pa e mcuhanan por haya les for di dje.

 

‘E ta super nice pa por a haya e sponsorship aki, paso normalmente e no ta facil pa yega na algo asina. Pero e tabata un meta cu nos tabatin paso awendia tur mucha ta haci uzo di articulo digital,’ juffrouw Tromp a expresa.

 

A pesar cu e enfoke primeramente tabata riba idiomanan, e lesnan a tarves di e borchinan digital ta enfoca tambe riba diferente area entre otro matematica.

 

Finalmente juffrouw Tromp a indica cu e ta contento di mira e entusiasmo di e muchanan ora cu ta haci uzo di e borchinan digital. Ta mira cu e muchanan ta mas motiva y tin mas participacion den les. Di e forma aki Scol Preparatorio Aurora ta sigui cumpli cu su metanan y ta hopi agradecido na Gobierno y Futura pa e oportunidad.