REAKSHON DI MINISTER DI FINANSA DI KÒRSOU RIBA AKUSASHONNAN TOKANTE UN DOÑO DI LISENSIA DI KÒRSOU.

Medionan di prensa brasileño ta alegá ku e kompania di wega ‘online’, Blaze, a wòrdu akusá pa outoridatnan brasileño di labamentu di plaka, estafa di klientenan, i depósito ilegal di fondonan pa ‘influencers’ ku ta promové kasino ‘online’. Blaze ta pertenesé na Prolific Trade N.V., un kompania establesé na Kòrsou, ku ta ser manehá pa E-Moore B.V., un kompania di trust ku tin lisensia di Kòrsou.

Minister Silvania a pidi outoridat di weganan di azar di Kòrsou (Gaming Control Board of Curaçao – GCB) pa investigá e akusashonnan i determiná si tin doño di lisensia di Kòrsou embolbí den e asuntu aki. Si konstatá ku un doño di lisensia di Kòrsou ta involukrá den kualke forma, minister ta urgi GCB pa tuma medida apropiá denter di su kontrol i segun su medionan aktual, kontra di e doño di lisensia respektivo mas pronto posibel.

Ademas, Minister Silvania a urgi Banko Sentral di Kòrsou i Sint Maarten (CBCS) pa kondusí nan propio investigashon, pasobra e proveedornan di servisio di trust lokal tin lisensia i ta wòrdu supervisá pa CBCS.

Segun e lei di supervishon vigente, kompanianan di wega ‘online’ ku ta operá basá riba un kontrato ku un doño di lisensia na Kòrsou (e asina yamá “sup-lisensia”), no ta bou di supervishon direkto di GCB. Esaki ta hasi hopi difisil pa Kòrsou regulá e sektor di wega ‘online’. Esaki ta e motibu prinsipal ku Minister Silvania for di momento ku el a asumí su funshon a hasi e reforma di e sektor di wega ‘online’ na Kòrsou su prioridat, inkluyendo e introdukshon di un lei nobo ku ta regulá wega di azar. E lei nobo (LOK) ku ta programá pa wòrdu introdusí mas lat e aña aki lo duna e regulador nobo, Curaçao Gaming Authority (CGA), e instrumentonan nesesario pa supervisá wega ‘online’ na Kòrsou basá riba standartnan internashonalmente aseptá.

Ounke e akusashonnan no a ser investigá i konfirmá kompletamente ainda pa outoridatnan lokal, ta inevitabel ku Kòrsou un biaha mas ta den lus negativo den komunidat internashonal. Tin LOK i CGA na lugá lo prevení i yuda mitigá aktividatnan no deseá i ilegal via di strukturanan di Kòrsou.

Minister Silvania ta kontentu di por bisa ku e konsepto di LOK a ser presentá na e Raad van Advies den e promé siman di yüni – esaki siendo e último paso promé ku presentá e lei na Parlamento.