Komishon Sentral di Parlamento a deliberá tokante e Inisiativa Proyekto di Lei pa kambio di e Proyekto di Lei di 27 di yüni 1996 pa stipulashon di e prinsipionan di e sistema penitensario (Ordenansa prinsipionan di e sistema penitensiario).

Parlamento di Kòrsou

Komishon Sentral di Parlamento a deliberá tokante e Inisiativa Proyekto di Lei pa kambio di e Proyekto di Lei di 27 di yüni 1996 pa stipulashon di e prinsipionan di e sistema penitensario (Ordenansa prinsipionan di e sistema penitensiario).
Djaweps 22 di yüni 2023, Miembronan di Parlamento a bin huntu den un Komishon Sentral pa deliberá tokante e Inisiativa Proyekto di Lei pa kambio di e Proyekto di Lei di 27 di yüni 1996 pa stipulashon di e prinsipionan di e sistema penitensario.
E reunion di Komishon Sentral no a dura largu, mirando ku no tabatin pregunta i remarke di parti di Miembronan di Parlamento. Normalmente durante un Komishon Sentral pa trata un konsepto di lei, Parlamentarionan por hasi pregunta i remarkenan tokante e konsepto di lei, kualnan lo keda poné den un relato. E relato aki despues lo mester haña kontesta por eskrito den un Nota.
Pero komo ku no tabatin ningun miembro inskribí riba e lista di orador, artíkulo 38 insiso 3 den e Reglamentu di Òrdu di Parlamento, ta stipulá ku Parlamento ta traha un ‘Eindverslag’, kual ta konosí tambe bou di e nòmber ‘Blanco Verslag’. Ora Komishon Sentral di Parlamento saka un ‘Blanco Verslag’ ta nifiká ku e proyekto di lei ta kla pa keda tratá den Reunion Públiko, kaminda lo por aprobá esaki formalmente pa e sigui su kaminda. Finalmente ta keda na Gobièrnu pa públika un Lei, despues di konsultá ku Raad van Advies.