KOPERATIVANAN PA UN DESAROYO SOSTENIBEL.

Willemstad- Dia 1 di yüli próksimo, koperativanan rònt mundu ta selebrá Dia Internashonal di Koperativa (#CoopsDay); e aña akí ku e tema “Koperativanan pa un desaroyo sostenibel”. Esaki, ta bai ta e di 101 selebrashon di Dia Internashonal di Koperativa i koperativanan na Kòrsou tambe ta selebrá. E selebrashon anual akí ta rekonosé e kontribushon signifikante di koperativanan na ekonomia global i nan ròl den konstrukshon di un futuro muchu mas sostenibel.

Den e mesun espíritu di e selebrashonnan mundial rònt di e Dia Internashonal di Koperativa, Minister di Desaroyo Ekonómiko, sr. Ruisandro Cijntje, ta hasi un yamada na tur koperativa lokal pa uni ku e koperativanan rònt mundu i mustra ku na Kòrsou tambe, koperativismo ta duna su kontribushon aktivo pa un desaroyo sostenibel. Aki na Kòrsou nos minister di Desaroyo Ekonómiko tin e enkargo pa sostené desaroyo i maneho di koperativanan di spar i krédito, produkshon (entre otro agrario, krio di bestia i peska), servisio i otro formanan di koperativismo.

Dia Internashonal di Koperativa (#CoopsDay) ta keda selebrá tur aña riba e promé djasabra di yüli dor di paisnan afiliá na Nashonnan Uní i International Cooperative Alliance (ICA). E tema di e aña aki (‘Koperativanan pa un desaroyo sostenibel’) ta mustra kon e manera di traha di e koperativanan rònt mundu, inspirá pa e balor i prinsipionan di koperativa, tin e logronan di e Metanan di Desaroyo Sostenibel (SDG) komo parti di nan DNA.

Minister Cijntje i henter su ministerio ta ekstendé palabranan di felisitashon na tur e koperativanan di spar i krédito, koperativanan di peska, koperativanan di krio di bestia, koperativanan agrario na Kòrsou i otro koperativanan di produkshon. Tambe un pabien ta bai na e dos federashonnan di koperativa na Kòrsou, kual ta FEKOSKAN i FKUP.