Pregunta na Minister di Enseñansa, Siensia, Kultura i Deporte pa duna klaridat riba investigashon di SOAB riba trayekto di nos Emblema Nashonal

 

Na: Presidente di Parlamento di Kòrsou

Sra. Ch. America-Francisca

Wilhelminaplein 4

Presente

 

Willemstad, 29 yüni 2023

 

Tópiko: Pregunta na Minister di Enseñansa, Siensia, Kultura i Deporte pa duna klaridat riba investigashon di SOAB riba trayekto di nos Emblema Nashonal

Honorabel sra. America-Francisca,

 

Señora presidente, pa medio di e karta aki suskrito ke hasi uso di artíkulo 96 di Reglamentu di Òrdu i ta pidi enkaresidamente pa bo persona por dirigí e karta aki ku e tópiko; ‘Duna klaridat riba investigashon di SOAB riba trayekto di nos Emblema Nashonal‘, na Minister di Enseñansa, Siensia, Kultura & Deporte sr van Heydoorn.

 

Atentamente,

 

 

Steven Croes

Frakshon di PAR

 

Na: Minister di Enseñansa, Siensia, Kultura i Deporte

Sr. C. van Heydoorn

WTC

 

Willemstad 29 yüni 2023

 

Tópiko: Duna klaridat riba investigashon di SOAB riba trayekto di nos Emblema Nashonal

 

Honorabel sr. van Heydoorn,

 

Na e gran evento di dia 10 di òktober 2022 na Brionplein a anunsiá e ganadó di nos Emblema Nashonal nobo i a introdusí e persona ku a krea e esaki. Siguiente dia despues ku a anunsiá e ganadó mesora a bini hopi reakshon riba e outentisidat di emblema i e proseso ku e komishon a kana pa yega na e resultado final, kual a resultá den un investigashon di parti SOAB.

 

Dia 26 di mei Minister a anunsiá ku e investigashon ta kla i ku Minister lo a reuní ku e komishon e siman despues. Mirando ku ya mas ku un luna a pasa kaba i ku dia 2 di yüli nos ta selebrá Dia di nos Bandera, kual ta di mesun importansia ku nos Emblema Nashonal, konforme artíkulo 96 di Reglamentu di Òrdu, suskrito ta puntra Minister di ESKD enkaresidamente pa por fabor kontesta di forma urgente e siguiente pregunta:

 

Minister por duna klaridat i di un forma transparente kiko a sali di e investigashon di SOAB?

 

 

Atentamente,

 

 

Steven Croes

Frakshon di PAR