Women’s Steering Committee Curaçao (WSCC) preokupá ku situashon di salubridat públiko

Willemstad; 29 di yüni 2023

 

Women’s Steering Committee Curaçao (WSCC) preokupá ku situashon di salubridat públiko

WILLEMSTAD – Direktiva di e organisashon Women’s Steering Committee Curaçao (WSCC), ku un grado di preokupashon hopi haltu, a sigui desaroyonan di último lunanan den salubridat públiko na Kòrsou. WSCC a ser fundá 48 aña pasá ku e meta pa sali na vanguardia di é hende muhé. Naturalmente pa e hende muhé ta bon, su famia tambe mester ta bon. Esei ta pone ku trabounan ku WSCC a i ta realisá tin enfoke riba bienestar di e famia, ku ta fundeshi di nos komunidat. E situashon den sektor di kuido di salú tin un efekto hopi negativo riba bienestar di kada miembro di famia. Sin ke tira kulpa riba ningun grupo di interes òf persona, WSCC ke tira lus riba e realidat ku manera kosnan ta bai último tempu den salubridat públiko sigur no ta den e direkshon ku mester bai. WSCC ta di akuerdo ku mester atendé ku situashon finansiero di pais i entidatnan vital pa bienestar di nos pais di un forma responsabel. WSCC ta alabes di akuerdo ku mester bin reformanan pa mehorá áreanan den salubridat públiko di un forma struktural. Pero den mes rosea WSCC ta remarká ku e reformanan hopi biaha ta ser apliká riba esnan mas vulnerabel. Manera e.o. nos hendenan di edat, hendenan ku malesanan króniko i hendenan di ménos rekurso.

Retonan den salubridat tin rònt mundu, pero direktiva di WSCC ta nota ku esnan den salubridat públiko na nos pais no ta ser atendé ku e seriedat ku  mester atendé ku esakinan. Pa basta tempu nos ta tende ku sitanan ku spesialistanan ta dura hopi luna. Spesialistanan di nan banda ya basta tempu ta bisa ku tin falta di basta spesialista pa asina por aliviá e situashon ku nan mester traha aden. Alabes informashon ta yega na konosementu di WSCC ku vários spesialista, último lunanan, sea a emigrá bai traha na otro pais i otronan ta pensando seriamente pa tambe hasi esaki. Nos hòspital ta den un situashon finansiero hopi serio i nos no ta bai trese solushon dor di tira palabra pa otro den medionan di komunikashon.

Direktiva di WSCC, saliendo partikularmente na vanguardia di miembronan di WSCC, miembronan di e mas ku trinta organisashon afiliá na WSCC i komunidat en general, ta hasi un yamada serio i urgente na nos gobernantenan, parlamentarionan, dirigentenan di entidatnan ku mester duna servisio di kuido di salú, pa sinta na mesa pa papia kabes friu pa  yega na solushonnan duradero pa nos kuido di salú. Si kontinuamente nos ta tende e ekspreshon “ku nos mes por”, ata e mihó momento pa nos demostrá ku nos por. Por konta ku, kaminda por, Women’s Steering Committee Curaçao ta dispuesto pa aportá den forma di diálogo sano, pa yega na solushonnan duradero den sektor di kuido di salú. Pa un pueblo por aportá na progreso di su pais i traha na bienestar di su famia i komunidat, mester atendé ku kuido di salú di un forma serio i responsabel. Kuido di salú mester ta aksesibel pa tur hende. Espesial pa esnan mas vulnerabel den nos komunidat. Laga nos pone emoshon un banda, stòp di tira kos pa otro via di medionan di komunikashon i atendé ku e retonan ku e seriedat nesesario ku esaki ta rekerí. Sino e kuenta ku nos ta haña presentá lo no ta esun di mas agradabel. Kòrda riba e dicho;  “Evitá ta mihó ku kura.Tambe riba esun ku e operashon a bai bon, pero lástimamente e pashènt a muri.”