AKUERDO HACKSHIELD

Willemstad – Minister di Enseñansa, Siensia, Kultura i Deporte (ESKD) sr. Sithree van Heydoorn a firma akuerdo huntu ku Minister di Tráfiko, Transporte i Planifikashon Urbano (TTPU) sr. Charles Cooper pa traha huntu na e trayekto HACKSHIELD CURACAO. E trayekto aki ta bai keda ehekutá den estrecho koperashon ku Bureau Telecommunicatie en Post (BTP) i Blue Nap Americas (BNA). E trayekto aki ta bira e promé ku ta bai hasi uzo di e sentro di datos den kuadro di digitalisashon di enseñansa.

Hackshield ta un aplikashon digital edukativo den forma di un wega (‘cybersecurity game app ’), ku ta enfoká riba seguridat sibernétiko spesialmente pa mucha entre e edat di 8 pa 12 aña. E wega aki ta mustra e mucha riba e oportunidatnan, peligernan di internèt i tambe riba e atakenan di kriminalidat sibernétiko. Alabes e ta kontribuí na e alfabetisashon digital (digitale geletterdheid) dor di siña nan via e kanalnan virtual i laga nan ta agentenan sibernétiko, kaminda nan ta yuda otro mucha, mayornan i adultonan ku no tin tur informashonnan pa ku internèt E aplikashon Hacksheild ta enfoká riba e seguridat sibernétiko kaminda e ta lanta konsientisashon i e konsenshi digital ku ta stimulá kada persona pa pensa promé ku aktua i usa internèt. Ya kaba tin basta munisipio i skolnan na Hulanda i Bèlgika ku ta forma parti di e famia di Hackshield. Tin un programa spesialmente kaminda ta krea hóbennan ku lo bira agentenan sibernátiko ku ta train i yuda otro mucha i adulto. Tambe tin paketenan edukativo ku por keda usá na skol kaminda ta stimulá e desaroyo di alfabetisashon digital.

Huntu den kolaborashon ku e tim di digitalisashon di Ministerio di ESKD, BTP i BNA ta traha riba e trayekto ku ta bai stimulá e desaroyo digital usando e idea di ‘Hub Digital’ di nos pais pa Latino Amerika. Hackshield lo host su ekiponan den BNA for di unda e lo no solamente sirbi kliente nan na Kòrsou pero tambe region di Karibe i Sur Amérika. BNA ta bai traha riba promoshon di e servisio dor di rebendé e servisio di Hackshield den Region di Karibe i Latino Amérika. BTP ta e organisashon ku ta enfoká riba regulashon i asesoramentu den sektor di telekomunikashon, postal, energia i aeropuerto di Kòrsou, y tambe nan ta desempeñá e papel di tim nashonal di respuesta di emergensia komputashonal (CARICERT) pa promové seguridat sibernétiko, ku e meta di sirbi interes di tur habitante di Kòrsou di manera independiente. Pa mas informashon di Hackshield por tuma nota di e produkshon athunto aki: https://youtu.be/5UXPgCYhTzs

Ku firmamentu di e akuerdo aki Gobièrnu di Kòrsou pa medio di e Ministerio di ESKD i Ministerio di TTPU ta pone e promé base pa aktivá e trayekto di Hackshield na Kòrsou.

—
KOMUNIKASHON

 

** riba e potrètnan athunto por tuma nota di e momentu ku Minister di ESKD sr. Sithree van Heydoorn i Minister di TTPU sr. Charles Cooper a firma e akuerdo den presensia di Direktor di BTP sr. Curt Belfor, Sekretario General di Ministerio di ESKD sra. Susan Larmonie-van Heydoorn, Direktor di Sektor di Enseñansa i Siensia sr. Wladimir Kleinmoedig i Presidente di Komishon di Digitalisashon sra. Samira Saab.

 

Pa mas potrèt por bishitá: Akuerdo entre Ministerio di ESKD i Ministerio di TTPU