KONSEHO DI MINISTER TA RISIBÍ BISHITA DI ATLETA GLENKA ANTONIA

WILLEMSTAD – Konseho di Minister a risibí e atleta Glenka Antonia ku a gana e promé medaya di plata pa Kòrsou na “Juegos Centro Americano del Caribe” na El Salvador .

Un delegashon di Federashon Deporte Olímpiko Kòrsou (FDOK) kual a representá Kòrsou, a partisipá na e Weganan Sentro Amerikano di Karibe 2023 na El Salvador. Nos hóbennan a kompetí den e ramo di deporte di tènis, atletismo, natashon, sòftbòl, beisbòl i ‘archery’. Nos atleta Glenka Antonia a sa di gana dor di bula un altura di 1.84 meter ku a poné logra konkistá e di dos lugá. Glenka Antonia, atleta femenino nasé 4 di sèptèmber 1999, ta praktiká e deporte di bula haltu (hoogspringen) i a gana e medaya di plata tambe na ODESUR aña pasá.

Gabinete Pisas den su totalidat a risibí e atleta i felisitá e hóben pa e logro akí. Tambe komo muestra di apresio, Minister enkargá ku Deporte sr. Sithree van Heydoorn a hasi entrega di un regalu na e atleta i a gradisié pa pone nòmber di Kòrsou resaltá den e kompetensia di bula altu.