PARTIDO MEP TA RECORDA 24 AÑA DI FAYECIMENTO DI SEÑORA GRACE HERNOMINO-BAREÑO
Partido MEP:
PARTIDO MEP TA RECORDA 24 AÑA DI FAYECIMENTO DI SEÑORA GRACE HERNOMINO-BAREÑO
Grace a lucha hunto cu nos Libertador Betico Croes y cu su perserverancia y contribucion valioso, awe Aruba ta un pais liber den Reino Hulandes
Historia di hende muhe den politica di nos pais, a keda marca pa muhenan fuerte y desisivo pa ta parti den e progreso y e bienestar di cada ciudadano. Partido Movimiento Electoral di Pueblo, MEP ta e Partido cu a habri caminda pa e prome hende muhenan na Aruba cuminsa un carera politica y destaca grandemente den nan trabou.
Grace Heronimo Bareño a laga un legado asina buntia y fuerte atras cu pa generacionnan nos dilanti lo wordo recorda como un dama fuerte den politica y como un ser femenino cu a traha incansablemente pa un meta comun di nos partido y comunidad en general.
Grace a nace na Aruba dia 22 di maart 1945 y a fayece dia 14 di juli 1999. Partido MEP ta recorda e di 24 aña di fayecimento di e gran politico/gobernante aki. Na un edad hoben Grace a tuma e decision pa drenta arena politico y tabata na e eleccion di Eilandsraad di 1975 cu Grace Bareño – como e prome dama cu a yega di aparece riba lista di nos partido – den su prome salida a obtene 455 voto, cual ta un cantidad considerabel e tempo ey. Te cu e eleccion di 1989 Grace fielmente a aparece riba lista di MEP.
Grace tabata tambe e prome dama na Aruba cu a asumi e encargo di diputado di Teritorio Insular di Aruba. Durante di su trayectorio como gobernante Grace a dedica gran parti di su trabao den e area social y a percura specialmente pa esnan cu limitacion den comunidad ya cu den pasado como profesional su persona semper a traha incansablemente pa e grupo special aki, e.o. na Bibito Pin school na Piedra Plat. Grace tabata tambe miembro di Eilandsraad. Como politico activo Grace a lucha schouder cu schouder cu nos Libertador Betico Croes y tabata danki tambe na su perserverancia y contribucion valioso, awe Aruba ta un pais liber den Reino Hulandes.