RIBA PETISHON DI MINISTER HATO KONSEHO DI MINISTER A NOMBRA DOS (2) DEURWAARDER ADISHONAL

Pa garantisá kontinuidat i efisiensia den e trabou realisá dor di “deurwaarder”, Konseho di Minister, riba petishon di Minister di Hustisia, mr. Shalten Hato, a bai di akuerdo pa nombra dos (2) deurwaarder mas i asina kompletá e total di ocho  deurwaarder ku konforme lei Kòrsou mester disponé di dje.

Ta trata aki di aspirant deurwaarder sra. Sonalie Rollins i aspirant deurwaarder sr. Matthijs van der Gulik. Tur dos tin años di eksperensha komo aspirant deurwaarder aki na Kòrsou.

Minister di Hustisia ta responsabel pa e proseso pa nombra deurwaarder. E proseso ta enserá ku na momento ku tin vakatura i ku interesadonan solisitá, Presidente di Korte Komun di Hustisia tin e enkargo pa kanalisá e proseso di solisitut, kual ta enserá entre otro skucha e interesadonan. Presidente di Korte Komun di Hustisia a hasi esaki formando parti di un komishon di selekshon ku ta konsistí di un deurwaarder, un miembro di tim di maneho di Orden di Abogado i naturalmente su mes persona. Seguidamente, Presidente di Korte Komun di Hustisia ta hasi un proposishon na Minister di Hustisia, indikando kua kandidato e komishon ta konsiderá mihó ekipá pa okupá e puesto(nan) vakante.

Basá riba lei, Minister di Hustisia ta risibí un proposishon ku ta enserá potensial kandidato ku tin nashonalidat Hulandes, ta fungi pa un periodo mínimo di tres (3) aña komo aspirant deurwaarder i ta residente di Kòrsou, for di kua e Minister por skohe. E proposishon no ta definitivo, pues Minister tin sierto libertat pa tuma e desishon ku e ta konsiderá mihó i e ta karga responsabilidat gubernamental pa e desishon aki.