FFK TA DESAPROBÁ VIOLENSIA DEN DEPORTE!

FFK TA DESAPROBÁ VIOLENSIA DEN DEPORTE!

Resientemente por a tuma nota den medionan di komunikashon i riba retnan sosial ku durante un partido di training entre 2 ekipo, miembro di FFK, a surgi un kaso di bringamentu i agreshon entre hungadónan ku a kondusí na detenshon di algun hungadó.

FFK ta lamentá e insidente aki enormemente i ta desaprobá i kondená tur tipo di akto di violensia sea riba vèlt durante wega, den training òf pafó di tereno. FFK lo no tolerá aktonan di violensia den futbòl. Despues di evaluashon, FFK lo tuma akshon si ta nesesario.

E deporte rei ta para pa rèspèt i union p’asina huntu sigui traha riba desaroyo di futbòl tantu riba nivel lokal komo internashonal.

FFK su enfoke ta pa trese un esfera sano i seif pa tur ku ta praktiká futbòl pero tambe pa tur fanátiko ku ta asistí na nos partidonan. FFK ta trahando duru pa fortalesé e lasonan di hermandat i halsa toleransia serka nos ekiponan for di e alanan hubenil te na e divishonnan mas grandi tantu pa nos liganan maskulino komo femenino.

 

Un biaha mas FFK ta hasi e petishon na tur futbolista, fanátiko i pueblo en general pa laga positivismo i empatia resaltá den kada akshon pa huntu nos konstruí un mihó komunidat.

Pronto rekuperashon pa tur ku a sufri un òf otro leshon i nos ta spera ku e insidente aki esklaresé mas pronto ku ta posibel.

 

14 yüli 2023