Maneho momentu di inspekshon di produktonan di konsumo
Maneho momentu di inspekshon di produktonan di konsumo
Willemstad – Resientemente tabatin un kontròl den kuadro di “Warenlandsverordening” na un kompania importadó na terenonan industrial na Seru Loraweg. Den e kuadro aki Inspekshon di Salubridat a bishitá un kompania pa hasi e inspekshonnan nesesario. Departamentu di THZ (Departamentu di Asuntunan di Higiena Tékniko) no tabata parti, e biaha aki, di e kontròl aki. Ta Inspektor di Protekshon di Salú a hasi e trabou di inspekshon i a manda un karta pa e kompania en kuestion relashoná ku e trabounan ku a keda desplegá.
Durante e kontròl a haña un kantidat di “appelbier” i pindakas ku resientemente nan fecha di vensementu a kaduká. E produktonan aki tabata poné den un sekshon apart. Den un frizer a bin topa ku algun kaha di kabaron ku nan fecha di vensementu a kaduká 2 dia pasá. E kompania a informá ku e kabaron no ta destiná pa benta, pero dor ku ainda nan ta bon pa konsumo humano ta hasi pèrmisibel ku e kompania por repartí esaki bou di empleadonan, despues di opservashon visual di e inspektor, ta lokual ku a tuma lugá tambe. E pindakas a wòrdu duná na kriadónan di bestia kual ya tin palabrashonnan previo ku riba base regular nan ta bin buska produktonan ku ainda ta apto pa konsumo di nan krionan.
Inspektor di Protekshon di Salú a tuma nota tambe di un registro di establesimentunan ku ta kumpra serka e kompania aki. Durante di e inspekshon por a tuma nota ku e produktonan i e empake tabata mustra den bon estado. No por a konstatá ku nan ta dañá. Tambe por a tuma nota ku e “appelbier” i e kabaronnan no tabata mustra niun klase di defekto ku por pone salú públiko na peliger. Debí na lokual ku a keda konstatá, Inspektor di Protekshon di Salú ta di akuerdo ku e maneho di e kompania pa repartí e produktonan bou di su personal i tambe na kriadónan di animal.
Konforme artíkulo 8 di “Warenlandsverordening” ta prohibí pa prepará òf pone na benta komestibel òf bebida ku pa motibu di nan defekto por pone salú òf seguridat di hende na peliger. Den e kuadro aki Inspekshon di Salubridat i THZ konosé 2 tipo di “keuring”. “Keuring” riba petishon i “keuring” na momentu ku konfiská produktonan. Ta importante pa sa ku benta di produktonan ku nan fecha di vensementu a kaduká ta prohibí. Pa loke ta trata produktonan ku a keda konfiská, e maneho di esaki ta ankrá den “Landsbesluit 2003”. Inspekshon ta konfiská produktonan na momentu ku:
1 E komestibel òf bebida a daña.
2 Inspekshon tin e impreshon òf prueba ku komestibel òf bebida ku nan fecha di
vensementu a kaduká deliberadamente a keda poné pa benta.
Produktonan ku fecha di vensementu a kaduká, pero ku ta apto ainda pa konsumo humano por wòrdu otorgá na persona i/òf instansianan.
Komestibel i bebida ku no ta apto pa konsumo humano, pero ku por ser uzá komo kuminda pa bestia, por wòrdu duná na kriadónan di bestia. Komestibel i bebida ku no ta apto ni pa hende i tampoko pa bestia kome ta keda destruí. E maneho aki ta den liña i espíritu di e “Landsbesluit 2003” kual semper a wòrdu apliká.
