Maneho di Medio Ambiente ta atkerí aparato sofistiká pa detektá i rekonosé holó

Willemstad – Maneho di Medio Ambiente i Naturalesa (MNB) di Ministerio di GMN resientemente a atkerí 25 e-Nose kual ta aparatonan super sofistiká pa detektá i rekonosé tur klase di holó.  En realidat e-Nose ta un kombinashon di sensor ku ta detektá kambio den komposishon di airu i ta transmití e informashon aki pa un server sentral via un konekshon wireless.

Awor Maneho di Medio Ambiente por atendé situashonnan di molèster di holó muchu mas fásil ku e aparato aki. E e-Nose tin e abilidat pa detektá di kua supstansia e holó ta i por kalkulá tambe for di kua direkshon e holó ta bini i kua direkshon e ta sigui bai. Pronto lo apliká e aparatonan aki den un proyekto piloto pa despues implementá esakinan den áreanan urbano na Kòrsou kaminda tin molèster di kualkier tipo di holó.
Riba potrèt por mira momentu ku kolaboradó di MNB Edgarick Jansen ta informá Minister Pisas di e aparato sofistiká aki.