UN ‘BOOST’ PA NOS EKONOMIA: MINISTERIO DI HUSTISIA A PROSESÁ MAS KU 1000 PERMIT PA EVENTO DEN 2022
Shalten Hato
UN ‘BOOST’ PA NOS EKONOMIA: MINISTERIO DI HUSTISIA A PROSESÁ MAS KU 1000 PERMIT PA EVENTO DEN 2022
Mirando bèk riba e kantidat di pèrmit di eventonan ku a prosesá i tambe otorgá den aña 2022, Minister di Hustisia, mr. Shalten Hato, ta mira bèk ku satisfakshon ku Ministerio di Hustisia a koperá en grande pa ‘boost” ekonomia di Kòrsou i ta kontentu ku tin un kresementu den petishonnan pa organisá eventonan na Kòrsou.
Konforme Ordenansa Nashonal di Orden Públiko, Minister di Hustisia tin e outoridat pa otorgá pèrmit pa evento na esnan ku pidi esaki. E departamentu di Leinan Speshal (Unit Bijzondere Wetten (UBW)) ku ta kai direktamente bou di e Hefe di Servisio Polisial ta esun enkargá ku prosesamentu di tur petishon pa por haña un pèrmit pa un evento.
Minister di Hustisia den aña 2022 a prosesá un total di 1003 pèrmit di evento i a otorgá un total di 992 pèrmit di evento. Na luna di dezèmber 2022 a otorgá mas tantu pèrmit, ku un total di 200 pèrmit di evento ku a keda otorgá e luna ei. Dje 992 pèrmitnan otorgá, un total di 345 pèrmit tabata pa eventonan kultural i sosial. Remarkabel ta ku na luna di december 2022 mas tantu pèrmit ku a otorgá tabata pa eventonan kultural i sosial.
Minister Hato ta sumamentu satisfecho ku e trabounan ku e departamentu di UBW, bou di supervishon di e tim di maneho di Kuerpo Polisial a bin ta desplegá. For di aña pasá minister a start e proseso di optimalisashon di UBW pa asina brinda un servisio mas efisiente i efektivo na komunidat. E prosesonan di trabou pa atendé ku pèrmit di evento ya a keda deliniá i e parti di digitalisashon tambe ta den proseso. E meta ta pa digitalisá henter e proseso pa risibí pèrmit, esta di for di momentu ku entregá un petishon pa pèrmit na UBW t’e ku na e momentu ku risibí un kontesta riba e petishon.
Resientemente Minister di Hustisia a akordá e maneho di evento ku a ser diseñá den estrecho koperashon ku tur e departamentunan konserní i tambe e promotornan. Gobièrnu di Kòrsou ta kontentu ku porfin ta bai tin un maneho di evento ku ta trese alegria i goso pa esnan ku ta bishitá e eventonan i finalmente stimulá kresementu ekonómiko.
