𝗞𝗔𝗗𝗔 𝗛Ó𝗕𝗘𝗡 𝗠𝗘𝗥𝗘𝗦𝗘 𝗨𝗡 𝗢𝗣𝗢𝗥𝗧𝗨𝗡𝗜𝗗𝗔𝗧 𝗣𝗔 𝗨𝗡 𝗙𝗨𝗧𝗨𝗥𝗢 𝗠𝗜𝗛Ó!

Paso pa paso, nos ta mira progreso den Justitiële Jeugd Inrichting Curaçao.

Huntu ku SOAB, direktor interino sra. Natascha Pieter i personal di JJIC, mi a tene un reunion kaminda nos a risibí aktualisashonnan positivo tokante e desaroyonan den e instituto.

Pronto e trabounan di remodelashon di e werkplaatsnan lo kuminsá. E hóbennan a kuminsá ku lès di landamentu, nan a risibí lès di traha bolo i pasapalos, i pronto nos lo anunsiá un trayekto nobo di scouting.

Esakinan no ta simplemente aktividat, sino oportunidatnan pa nos hóbennan deskubrí nan talento, desaroyá nan mes i bolbe kere den nan futuro. Ainda tin trabou pa hasi, pero e pasonan positivo aki ta duna nos motivashon pa sigui.

Manera mi a indiká den reunion: “Un eror den pasado no mester definí futuro di un hóben”. Nos ta sigui traha, ku konvikshon ku kada hóben ku nos yuda riba un kaminda mihó, ta un invershon den futuro di Kòrsou.