Pronóstiko di tempu pa Kòrsou i bisindario bálido te djadumingu mainta 06:00 o.l., 23 di yüli 2023.

Pronóstiko

Pronóstiko di tempu pa Kòrsou i bisindario bálido te djadumingu mainta 06:00 o.l., 23 di yüli 2023.
Kompilá: djasabra 22 di yüli 2023, 05:00 o.l. (09:00 UTC).

Tempu: Parsialmente nublá ku chèns pa algu di áwaseru durante e promé mitar di dia i mas atardi basta nublá i seku. Tambe bientu lo sigui supla de bes en kuando un poko fuerte.

Temperatura máksimo lo alkansá 32ºC i temperatura mínimo 27ºC.
Solo ta sali 06:21 i ta baha 19:04 o.l.

Bientu: For di direkshon ost i moderá te basta fuerte; forsa 4 te 5 (20 te 39 km/ora, 11 te 21 nudo). De bes en kuando fuerte den ráfaga; forsa 6 (40 te 50 km/ora, 22 te 27 nudo).

Situashon general: Un área di preshon haltu riba Atlántiko nort lo sigui yuda generá un fluho di bientu basta duru den nos region, di manera ku nos laman ta kontinuá lokalmente basta brutu durante e próksimo 24 ora. Ademas, un airu relativamente seku ku ta kubri nos region, lo sigui stroba desaroyo di nubianan signifikante riba nos isla ku lo mantené nos wer pa gran parti di dia seku. Apesar di esaki, un haltu grado di humedat durante oranan di mainta lo stimulá formashon di nubia somero na nivel abou ku por laga algu di awa kai riba partinan isolá di Kòrsou. Durante e di dos mitar di dia, un disturbio na nivel haltu di atmósfera, lo sostené basta nubia di nivel haltu riba nos region. E nubianan lo no kousa áwaseru den nos área.

Kondishon di laman: Moderá ku altura di olanan entre 1 i 2 meter (3 i 6 pia). E olanan di mas haltu lo ta riba laman habri por lo general na nort.

Sistemanan signifikante di wer tropikal: Un área di preshon abou situá riba osean Atlántiko, tin chèns haltu (70% na e momentu aki) pa sigui desaroyá den un depreshon tropikal durante próksimo 5 dianan. E sistema aki ta move den un direkshon wèst i lo alkansá e region Karibense durante komienso di e siman benidero. Servisio Meteorológiko lo drenta den un fase di informashon na komienso di e siman nobo.

Fenómeno spesial: Ningun.

Perspektiva te djaluna mainta: No ta antisipá nubianan signifikante i wer seku lo prevalesé.

Meteorólogo: Correa.