Minister Shalten Hato ”POLIS DI BARIO” MAS SERKA DIBO

Minister Shalten Hato

”POLIS DI BARIO” MAS SERKA DIBO
Pa yuda alsa seguridat, òrdu i trankilidat den barionan, Minister di Hustisia mr. Shalten Hato huntu ku Kuerpo Polisial lo bai enfoká mas riba e proyekto di polisnan di bario.
Kuerpo Polisial di Kòrsou konosé algun agente polisial ku e funshon di ‘’Regisornan di Bario’’ (buurtregisseurs). E Regisornan di Bario tin un ròl sentral den prevenshon di kriminalidat i inseguridat den barionan di Kòrsou. Regisornan di Bario tin komo tarea prinsipal pa señalá tur problemanan sosial i defisiensianan di infrastruktura den barionan i huntu ku demas organisashonnan, traha riba solushonnan duradero di esakinan pa evitá situashon di inseguridat i kriminalidat den bario.
Aserkamentu Nobo
-E plan “Bario” na promé luga ta sòru pa Regisornan di Bario ta disponé di e rekursonan nesesario pa por hasi nan trabou mas efektivo, prinsipalmente pa por komuniká mas mihó ku habitantenan den e diferente barionan.
-Lo sòru tambe pa Regisonan di Bario haña guia i entrenamentu mas avansá di manera ku nan por yega na solushon duradero den barionan. Entre otro, lo duna Regisornan di Bario oportunidat pa haña mihó bista di kon sierto barionan ta desaroyá solushonnan, entre otro Montaña, Otrobanda i eksperensianan djafó manera Comuna 13 di Medellin.
-Lo redefiní e areanan (rayònnan) di manera ku e Regisornan di Bario por enfoká periódikamente riba areanan mas manehabel pa por kondusí na mihó resultado.
-Lo tin un aserkamentu mas efektivo ku e Tim di Polis di Bario pa yuda esakinan aktua ku mas diligensha ora Regisornan di Bario manda señal ku tin problema ku polis mester atendé pa evitá ku esakinan ta eskalá.
-Entre e aktividatnan i proyektonan spesífiko den bario, por lo ménos un bia pa aña lo organisá un Marshe di Seguridat, kaminda habitantenan por informá nan mes di medidanan di prekoushon ku nan mes por tuma pa seguridat di nan mes i nan propiedatnan, pero tambe konsientisá e habitante di su ròl pa yuda señalá i komuniká situashonnan ku por hiba na inseguridat.
-Tambe lo yega na protokòlnan di koperashon ku diferente otro ministerio pa garantisá esfuerso konhunto i kórdinashon di proyektonan ku ta yuda trese solushon pa seguridat den barionan.