Minister Shalten Hato PROPOSISHON PA RE-INTRODUSÍ KURÁ PA E PROBLEMÁTIKA DI ‘FEVER’ I KOREMENTU SIN SEGURO I IMPUESTO PAGÁ
Minister Shalten Hato
PROPOSISHON PA RE-INTRODUSÍ KURÁ PA E PROBLEMÁTIKA DI ‘FEVER’ I KOREMENTU SIN SEGURO I IMPUESTO PAGÁ
Durante konsulta triangular a bini proposishon pa re-introdusí e asina yamá “Kurá” pa por halsa seguridat den tráfiko enfokando riba esnan ku no ta mantené nan mes na reglanan den tráfiko. Ministerio Públiko, Kuerpo Polisial, Prokurador General i Minister di Hustisia resientemente a debatí i yega na strategianan kon pa sigui atendé ku e situashon (aktual) di kriminalidat den nos pais.
Primeramente a para ketu na e desbalanse den e kadena hudisial kaminda ku tantu gobièrnu di Kòrsou komo di Hulanda ta hasi invershonnan den diferente organisashon. E presidente di e grupo di tarea a splika ku ta trahando riba un konferensia di Reino i tambe ta hasiendo investigashon pa despues presentá e resultado basá riba datos na e ministernan di Hustisia den Reino Ulandes.
Na e momentonan aki ta finalisando ku un maneho, kaminda KPC por uza komo base pa kita vehíkulo for di un persona ku di forma iresponsabel ta hasi uso di kareteranan públiko, sin kumpli ku su deber di paga impuesto di outo òf seguro di outo. E meta di e maneho aki ta pa bini ku e asina yamá “Kurá” bèk, pendiente e proseso di digitalisashon i kambio di lei pa asina di un forma atministrativo sankshoná esnan ku ta hasi nan mes kulpabel na esaki.
Halsamentu di seguridat den trafiko aki na Kòrsou tambe tabata tópiko den e konsulta triangular. A kumbiní ku lo bai atendé ku butamentu di “fever” riba kareteranan públiko dor di entre otro dialogá ku esnan ku tin di aber ku e tema aki.
Prokurador General finalmente a duna un rekuento di e proseso di solisitut ku ta kanando pa asina Kòrsou por haña un Prokurador General nobo na momentu ku esun aktual baha ku penshun na febrüari 2024. Na ougùstùs benidero Minister di Hustisia lo risibí e konseho den kual ta proponé un kandidato pa bira e proksimo Prokurador General.
Kuerpo polisial, Ministerio Públiko i Minister di Hustisia kada un tin nan propio tarea-, outoridat- i responsabilidatnan. E miembronan di e konsulta triangular ta konsultá regularmente ku otro pa diskutí prioridatnan di e kadena hudisial. Pa loke ta trata mantenshon di órden públiko òf asistensia, Minister di Hustisia tin e outoridat riba polis. Ora laga polis (òf Reshershi Nashonal) investigá un delito, nan ta hasi esei bou di responsabilidat i outoridat di Prokurador General.
