BASTA SIUDADANO TA BIAHANDO KU SEDULA ENTRE E ISLANAN DEN REINO HULANDES

Minister Shalten Hato

BASTA SIUDADANO TA BIAHANDO KU SEDULA ENTRE E ISLANAN DEN REINO HULANDES
E desishon pa duna siudadanonan ku nashonalidat Hulandes establesé na Kòrsou, Sint Maarten i islanan BES e posibilidat pa biaha ku sédula, sigur ta dunando un resultado positivo, di akuerdo ku Minister di Hustisia mr. Shalten Hato.
Pa fasilitá biahamentu den Reino Hulandes, e ministernan di Hustisia na 2022 a akordá ku siudadanonan ku nashonalidat Hulandes di Kòrsou, Sint Maarten i e parti Karibense di Hulanda, o sea e islanan Boneiru, Saba i Sint Eustatius, entrante mei 2022 a introdusí bèk biahamentu ku sédula entre e paisnan menshoná.
Durante e último Konsulta Hudisial di Kuater Pais (Justitieel Vierlanden Overleg, JVO) a toka diferente tema enkuanto koperashon di e 4 paisnan riba tereno hudisial. Un di e temanan den e Konsulta Hudisial aki ta biaha ku karchi di identifikashon den parti karibense di Reino ku eksepshon di Aruba. Na yanüari 2023 tur e 4 ministernan di Hustisia a bai di akuerdo pa sigui ku e proyekto aki i a akordá ku na final di aña 2023 lo bolbe evaluá e proyekto aki.
Pa siudadanonan di Aruba tambe ta vigente ku ta aseptá nan sédula pa drenta e islanan BES, Kòrsou i tambe Sint Maarten. Sinembargo, pa biahenan pa Aruba tur siudadano mester biaha ku nan pasaporte. Pues niun siudadano no por biaha (ainda) ku un sédula ku destinashon pa Aruba. E medida aki tampoko ta aplikabel pa biaheronan entre e islanan partisipante i Hulanda. Pa biahenan pa Hulanda, un pasaporte ta keda nesesario. Pa e Hulandes oropeo tambe uso di su sédula na entrada na Kòrsou, Sint Maarten òf islanan BES, no ta aplikabel.
Komo e titutlar responsabel pa frontera di Kòrsou, Minister Hato ta sigui traha riba optimalisashon di e servisio na frontera dor di entre otro aportá na proyektonan ku ta hasi biahamentu mas fásil pa nos siudadanonan, pero semper salbaguardiando e seguridat di nos isla.