Ministerio di Hustisia ta presentá su Agènda di Maneho Hudisial 2025–2029: “Hustisia Fortifiká – Pa un Kòrsou Seif, Hustu i Stabil”

Mas seguridat, kombatimentu di kriminalidat, protekshon di nos hóbennan i modernisashon di kadena hudisial ta entre e prioridatnan prinsipal.

WILLEMSTAD – Ministerio di Hustisia ta presentá su Agènda di Maneho Hudisial pa período 2025–2029, bou di lema “Hustisia Fortifiká – Pa un Kòrsou Seif, Hustu i Stabil”. E agènda aki ta determiná e direkshon di maneho pa e próksimo añanan, ku enfoke riba fortalesé seguridat, estado di derecho, kombatimentu di kriminalidat i un sistema hudisial mas moderno i humano.

E agènda ta konsentrá riba sinku área prinsipal:

1. Mas seguridat i kombatimentu di kriminalidat

Intensifiká e lucha kontra kriminalidat organisá, ladronisia di outo, atrako, tráfiko di arma, labamentu di plaka i tráfiko di hende. Fortalesé presensia polisial den bario, modernisá ekiponan di seguridat i invertí den prevenshon di kandela i seguridat di tráfiko. Tambe tin plan pa konstrukshon di un pòst nobo di Brantwer na Banda Riba.

2. Prevenshon di kriminalidat hubenil

Un aserkamentu integral pa prevení ku hóbennan ta kai den kriminalidat, ku mas koperashon entre skol, famia, polis i instansianan sosial. E enfoke ta riba prevenshon, guia, edukashon i oportunidatnan di trabou, komo tambe kombatimentu di violensia na skol.

3. Detenshon humano i resosialisashon

Traha na e preparashonnan pa konstrukshon di un prizòn nobo, mehorashon di infrastruktura di SDKK i JJIC, fortalesé di kuido forénsiko i mas oportunidat di edukashon, formashon i reintegrashon pa personanan detené.

4. Maneho di migrashon

Desaroyá un sistema di registrashon pa personanan sin dokumento, evaluá posibilidatnan di legalisashon temporal bou di kondishonnan i traha na un maneho di migrashon duradero ku ta respetá derechonan humano i protehá órden públiko.

5. Modernisashon i servisio mas efisiente

Invertí den digitalisashon, inovashon i modernisashon di servisio hudisial. Entre otro, e plan ta kontemplá proyektonan piloto ku bodycam, detenshon elektróniko, uso di kámara i inteligensia artifisial, protekshon di datonan personal i redukshon di tempu di espera pa trámite di pèrmit.

Fortalesé kadena hudisial

Ademas di e sinku área prinsipal, Ministerio di Hustisia lo sigui invertí den formashon i reklutashon di personal, integridat, modernisashon di ekiponan i koperashon entre instansianan hudisial. Koperashon ku partnernan lokal, regional i internashonal lo keda un elemento fundamental den e maneho.

Minister Hato ta enfatisá ku e agènda aki no ta solamente un dokumento di maneho, sino un kompromiso ku komunidat di Kòrsou pa sigui invertí den seguridat, hustisia i dignidat humano. “Nos lo kontinuá pa fortalesé nos kadena hudisial, kombatí kriminalidat ku determinashon i garantisá ku kada siudadano por biba den un Kòrsou mas seif, hustu i stabil.” Ku e Agènda di Maneho Hudisial 2025–2029, Ministerio di Hustisia ta stipulá e prioridatnan ku lo guia su trabou durante e próksimo añanan, ku resultadonan ku lo ser monitoreá mediante indikadónan di prestashon.

[FIN DI KOMUNIKADO]

JUS_ManehoHustisia_271026