MINISTER DI HUSTISIA SHALTEN HATO TA SIGUI ALSA SEGURIDAT DI TANTU EMPLEADONAN KOMO KLIENTENAN DEN SDKK

Minister di Hustisia, mr. Shalten Hato ta sigui dediká atenshon pa alsa e nivel di seguridat di tantu empleadonan komo klientenan ku ta kumpliendo ku un kondena den SDKK. For di aña pasá a duna inisio na e trayekto pa optimalisá e sistema di komunikashon den e instituto di korekshon.

For di aña pasá a akordá un plan pa instalá un total di 250 unidat di interkòm den SDKK kual lo ser ehekutá den kuater fase. Aña pasá ya a instalá 60 unidat di interkòm i pa e aña aki lo instalá un total di 26 i tambe lo renobá e “server”, miéntras lo “upgrade” e sistema ku un aplikashon mas modèrno. Banda di esaki lo ekipá un sentral ku por komuniká den un plataforma di forma efisiente.

Pa aña 2024 i 2025 lo amplia e sistema ku 82 unidat pa kada aña, p’asina kompletá un sistema di komunikashon optimal i efisiente den e instituto, alsando di e forma aki e nivel di seguridat tantu pa e personal komo pa e klientenan.