KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

NOTISIA

Preguntanan relashoná ku e estudio forénsiko di Deloitte Forensic riba e kaso di Girobank N.V.

 

 

Willemstad, 15 di ougùstùs 2023

 

Presidente di Parlamento di Kòrsou

Señora  Charetti M. America-Francisca

Wilhelminaplein # 4

Presente

 

 

Señora Presidente,

 

Pa medio di e karta aki, suskrito Amerigó C.M. Thodé Lider di Frakshon di Movementu Futuro Kòrsou (MFK) hasiendo uso di artíkulo 96 di Reglamentu

di Òrdu i tambe artíkulo 57 di nos Areglo di Estado, na nòmber di nos Frakshon,

ke pidi bo persona mas pronto ku ta posibel pa dirigí e karta athunto na Minister di Finansa señor mr. drs. Javier F.A. Silvania, pa preguntanan ku mi persona a hasi na e minister konserní.

 

Di antemano un danki pa e koperashon.

Atentamente,

 

 

_________________                        

Amerigó C.M. Thodé

Miembro di Parlamento

Lider di Frakshon MFK

 

Willemstad, 15 di ougùstùs 2023

 

Minister di Finansa

Señor  mr. drs. Javier F.A. Silvania

Pietermaai # 44

Presente

 

Tópiko: Preguntanan relashoná ku e estudio forénsiko di Deloitte Forensic riba e kaso di Girobank N.V.

 

 

Señor Minister Silvania,

 

Na nòmber di Frakshon di Movementu Futuro Kòrsou (MFK)  pa medio di e karta aki suskrito,  Amerigó C.M. Thodé, Lider di frakshon, ke pidi bo atenshon pa lo siguiente:

 

Resientemente Parlamento a risibí un kopia di e (samenvatting) resúmen di e  studio ku Deloitte Forensic Nederland a hasi enkuanto e desaroyonan na Girobank N.V. ku a resultá den bankarota di e instituto aki.

Na promé lugá mi tin ku indiká Minister ku mi persona ta masha malkontentu ku di parti di Banko Sentral Parlamento ta risibí un resúmen di e studio aki. Mi ta haña ku e manera aki Banko sentral ta demonstrá ku e no tin ningun klase di étika ni tampoko rèspèt pa Parlamento dor di entrega e órgano mas haltu di nos komunidat ku ta Parlamento un resúmen i mi ta pidi bo persona den e kaso aki minister di finansa  entrega Parlamento e rapòrt original di e studio ku Deloitte Forensic Nederland a traha riba e kaso di Girobank N.V.

Na di dos lugá mi kier kuminsá pa bisa ku e bankarota di Girobank N.V. a kousa bastante konsternashon pa e klientenan di Girobank N.V. en partikular pero tambe a hasi hopi daño na nos imágen komo sentro finansiero i na e presupuesto di Gobièrnu.

 

Aparte di e echo ku e debakel finansiero aki a oumentá nos debe nashonal ku mas ku NAf 447 mion kual ta pueblo tin ku paga bèk, tin e asina yamá akuerdo ku e minister di finansa anterior sr. K. Gijsbertha a firma ku CBCS pa oumentá e licence fee. Esaki na su turno lo trese kuné ku moneda estranhero lo bira mas karu, hasiendo bida di e konsumidó aún mas karu. Tur esaki pa kumpli ku un kompromiso ku e gobièrnu anterior a hasi ku CBCS pa asina kubri e pèrdida ku CBCS lo a hasi manera e resúmen forénsiko ta bisa dor di laga Girobank N.V. para den kòrá sin garantia.

 

Aparte di esaki, nos tabatin e asuntu di e benta (SWAP) di oro ku CBCS a hasi pa kubri nan pèrdida, e asuntu di ENNIA tambe lo por representá otro problema ku implikashon pa nos presupuesto.

E resúmen forénsiko aki i e desaroyonan rondó di CBCS ta motibu di bastante inkietut i preokupashon den pueblo.

Frakshon di MFK hasiendo uso di e derecho di hasi pregunta ankrá den artíkulo 96 di Reglamentu di Órden i tambe artíkulo 57 di nos Areglo di Estado, na nòmber di nos Frakshon mi kier hasi señor Minister Silvania e siguiente preguntanan:

 

  1. Kual ta minister su opinion enkuanto e resúmen forénsiko kual a ser hasí pa Deloitte Forensic Nederland?
  2. Kuantu e estudio forénsiko aki a kosta i kual instansia a paga pa esaki?
  3. Ta bèrdat ku e ex-presidente interino dr. R. Traa a ninga di kolaborá ku e estudio forénsiko aki?
  4. Kiko ta balor di e estudio forensiko aki si esun ku tabata responsabel durante na momento di e debakel ta ninga di kooperá ku Deloitte Forensic Nederland?
  5. Ta bèrdat ku e gerensia di CBCS ku tabata na mando na momento ku Girobank N.V. a ser poné bou di e Areglo di Emergensia na 2013 no a ser entrevistá?
  6. Kual ta e motibu ku Deloitte Forensic Nederland no a entrevistá e gerensia di e turno ei?
  7. Ki balor nos mester duna e estudio forénsiko aki si dr. Traa a ninga di kooperá i gerensia di 2013 no a ser entrevistá?
  8. Den e resumen forensiko nos ta konkluí ku te na final di 2016 e debe di Girobank N.V. na CBCS tabata NAf 60 mion i tabata respaldá ku garantia. Kual ta e motibu ku despues tòg a laga e debe aki subi i no tabatin garantia mas?
  9. Kua paso minister a tuma òf ta pensa di tuma awor ku tin e studio forénsiko aki kontra e gerensia di CBCS pa asina no ta pueblo so tin ku karga e konsekuensianan?
  10. E raport ta bisa ku apesar ku CBCS a hasi un studio forénsiko i a hasi denunsia, OM no a persiguí e presunto outornan intelektual di e debakel di Girobank N.V. Esaki a resultá den e pèrdida aki. Kual ta opinion di minister enkuanto esaki? Minister ta dispuesto pa pidi klarifikashon serka OM?

Minister lo laga Banko Sentral bolbe hasi un aangifte na OM?

Minister lo aserka minister di Hustisia pa tuma nota di e raport aki?

  1. Ki gobièrnu ta hasiendo atraves di e Hunta di Komisario di CBCS pa garantisá ku e fayonan kometé dor di gerensia di CBCS no ta keda sin konsekuensia?
  2. Kiko gobièrnu ta hasi pa evitá un ripitishon di fayonan di tal índole?
  3. Ta un Banko Sentral kompartí nos tin ta kon bini a eksonerá Gobièrnu di St. Maarten for di esaki i ta Gobièrnu di Kòrsou so tin ku paga e debe aki via di un Licence fee, kaminda esaki tin konsekuensha pa solamente Gobièrnu di Kòrsou?
  4. Kiko tabata e opinion di e (vermogengerechtende) di St. Maarten riba e debakel finansiero di Girobank N.V. aki?
  1. Minister ta di akuerdo ku ami ku Banko Sentral den e kaso aki ta parti di e problema aki pa su (toezichthoudende taak) ku Banko Sentral mester a ehersé den Girobank i konsekuentemente a faya ku su responsabilidat pa hiba kontròlnan rigoroso den Girobank?
  2. Minister no ta haña ku Banko Sentral tambe via di su reservanan mester kubri parti di e gastunan aki dor ku Banko Sentral den e kaso aki a faya ku su responsabilidat?
  3. Ta ken ta e persona òf personanan ta bai karga responsabilidat pa e debakel finansiero den Girobank aki?

 

Rekordando bo persona na e obligashon den nos Areglo di Estado pa duna miembronan di Parlamento tur informashon rekirí i na e obligashon den e Protokòl firma entre Parlamento i Gobièrnu pa duna e informashon aki no mas tardá ku denter di dos (2) luna, Frakshon di MFK ta keda en espera di bo kontesta.

 

Atentamente,

 

_________________                        

Amerigó C.M. Thodé

Miembro di Parlamento

Lider di Frakshon MFK

 

 

 

 

 

639114718427035"
639114718427035"