Senso23 ta bai ranka sali

Willemstad, 16 ougùstùs 2023

 

Senso23 ta bai ranka sali

Pa nos sa kon nos ta!

 

Willemstad – Despues di vários luna di preparashon Ofisina Sentral di Statistik (Centraal Bureau voor de Statistiek – CBS) i e tim di Senso ta kla pa start Senso23. Durante e periodo  di 2 di sèptèmber pa 20 di òktober Senso lo pasa na tur kas na Kòrsou pa hasi konteo di habitante i bibiendanan riba e isla. Durante di e periodo aki e enkuestadónan lo ta aktivo henter dia pa asina konta tur hende.

 

Enkuestadónan

Durante e periodo di Senso23 e enkuestadónan (+/-750) lo pasa kas pa kas, den e barionan di Kòrsou pa enkuestá personanan den kada kas di famia. Tur enkuestadó ku presentá na kas di un persona, tin un ‘hesje’ (chaleko) blou ku logo di Senso23 bisti. Kada enkuestadó mester identifiká su mes ku un ‘badge’ ku su potrèt i nòmber. E badge tin firma di e direktor riba dje. Tambe tin un QR code riba e badge, ku por scan si ke verifiká ku e enkuestadó ta un enkuestadó ofisial di CBS. Por yama tambe na number di telefòn 839-2300 of 520-2227 pa verifiká esaki. E último aki ta number di Whatsapp tambe.

 

 

Formularionan di pregunta

E biaha aki e enkuestadónan ta yena e formulario di Senso23 den forma digital. E lista di pregunta ta den 4 idioma (papiamentu, spañó, ingles i hulandes). Ta usa e idioma ku e personanan di e kas di bibienda ta preferá. E preguntanan tokante entre otro demografia tur persona den kas ta kontestá, i un persona den e famia ta kontestá e preguntanan tokante e bibienda.

 

Fasilitá e proseso

E enkuesta lo dura mas o ménos 45 minüt. Esaki ta dependé kon grandi e kas di famia ta. Naturalmente ta bon pa tur hende den kas duna nan aporte kompletu. Loke por fasilitá e proseso, ta si tur hende tin algun informashon na man pa asina por kontestá e preguntanan mas lihé. Riba website di Senso23 tin un checklist ku por usa. Esaki ta e link https://senso.cbs.cw/cheklist-pa-senso-2023.

 

Anónimo

Senso ta kompletamente anónimo. Lei di Statistik ta indiká ku tur informashon individual kolektá den Senso mester ta sekreto. Lei di Statistik ta aksesibel riba e wepsait di CBS, www.cbs.cw.

 

Alternativa

Si e enkuestadó di Senso23 pasa na un kas kaminda niun habitante ta presente, e enkuestadó lo usa e alternativa di laga un karta pa e habitante pa e por pasa atrobe. E habitante por yama pa traha un sita na un momento ku sigur e lo ta presente. Di e otro banda, si akaso un hende ripará ku enkuestadónan di Senso23 no a pasa su kas ainda, e por tuma kontakto ku CBS dor di meil senso@cbs.cw òf yama 839-2300/520-2227 òf manda mensahe via di Whatsapp pa e último aki.

CBS ta konta ku kada miembro di komunidat lo koperá pa hasi Senso23 tambe unu eksitoso. Pa e motibu aki CBS ta yama un i tur pa duna aporte kompleto, ya asina nos sa kon nos ta.