Promé Minister Gilmar Pisas a risibí e representante residente di Undp for di trinidad & tobago.

Willemstad – Promé Minister sr. Gilmar Pisas, huntu ku Minister di Enseñansa, Siensia, Kultura i Deporte sr. Sithree van Heydoorn, a rísibí sr. Ugo Blanco, Representante Residente di e Program di Nashonnan Uni pa Desaroyo (UNDP) for di Trinidad & Tobago dia 14 di ougùstùs 2023.

 

Sr. Ugo Blanco a keda akompañá pa sra. Isele Robinson-Cooper (Programme Officer-Inclusive Growth & Social Policy).

E meta di su bishita tabata pa sera konosí ku nos Promé Minister sr. Gilmar Pisas i tambe ku tur e profeshonalnan den diferente ministerio ku e UNDP Multicountry Office pa Trinidad & Tobago, Aruba, Kòrsou i Sint Maarten, a bini ta traha kun’é riba diferente tema i área i presentá alabes parti di e trabounan ku UNDP a realizá sirbiendo Kòrsou.

 

Esaki tabata un bishita di kortesia kaminda sr. Ugo Blanco a haña e oportunidat pa sera konosí ku ambos minister i alabes elaborá riba diferente tema manera entre otro e asuntu di sargasmo, enfermedat di e koralnan den nos laman, digitalisashon di nos enseñansa, kambio di klima, energia duradero, maneho di resiklahe i seguridat sibernétiko riba e área di enseñansa pa ku kompartimentu di informashon.

Ambos minister a mustra interes pa sa kua ta e tipo di sosten ku e ofisina di UNDP por duna Kòrsou espeshalmente pa ku e parti di sosten tékniko manera skirbi maneho, traha e leinan nesesario i alabes duna sosten na e parti di implementashon di kualkier proyekto ku ta enserá e diferente temanan ku a keda atendé durante di e bishita aki.

 

Na final di e bishita sr. Ugo Blanco a hasi entrega di su karta kredensial (Letter of Credence) na Promé Minister sr. Gilmar Pisas. Esaki ta un prosedura normal ora un funshonairo haltu ta kuminsá un puesto diplomátiko pa presentá su akreditashon na e Hefe di Estado òf den nos situashon e Hefe di Gobièrnu.

 

Durante di e korto estadia di dos dia na Kòrsou sr. Ugo Blanco a hasi uso di e oportunidat pa bishita Gobernadó di Kòrsou sra. Lucille George-Wout i representante interino di Hulanda sra. Saskia de Reuver.

Tambe e la reuní ku representantenan di e Ministerio di Salubridat Públiko, Medio Ambiente i Naturalesa, kaminda a elaborá riba aspektonan di bou di laman i naturalesa, representantenan di e Ministerio di Desaroyo Ekonómiko kaminda e la elaborá riba e parti di “Blue Economy” i e “National Development Plan”, i representantenan di e Ministerio di Maneho di Gobernashon, Planifikashon i Servisio Públiko kaminda e la elaborá riba e parti di digitalisashon di e servisio públiko i e aparato di Gobièrnu.

 

Sr. Ugo Blanco a keda sumamente kontento ku tur e kombersashonnan ku e i su miembro di tim a logra durante su estadia di dos dia na Kòrsou.