Diego di Galé ta yega djamars awor: Hopi espektativa pa konsierto bailabel na Kòrsou di Grupo Galé !

Diego di Galé ta yega djamars awor:

Hopi espektativa pa konsierto bailabel na Kòrsou di Grupo Galé !

Deurprijs: Pasashi pa Medellin…

WILLEMSTAD – Mientras ku e fecha ta aserkando pa e tremendo Konsierto Bailabel ku Grupo Galé na Kòrsou, e espektativanan ta oumentá, tantu lokal komo internashonalmente. Dia 26 di ougùstùs próksimo ta bai tin un fundraising, pa rekoudá fondo pa Fundashon Birgen di Rosario. Un konsierto bailabel ku ademas di partisipashon di Grupo Galé, ta konta tambe ku Son CC i DJ Carlito. E evento ta tuma lugá  8or di anochi pa 2or di marduga, na La Hacienda Olivia, na Skèrpène.

Den tur skina di Kòrsou entretantu ta konosi ku Grupo Galé ta na kaminda pa Kòrsou. E doño di Grupo Galé, Diego ta yega Kòrsou, djamars awor 22 di ougùstùs, mientras ku e sobra integrantenan di Grupo Galé, ta pone pia na Kòrsou, djabierne 25 di ougùstùs. Ta importante pa remarká ku Grupo Galé, ku ta bini direktamente for di Colombia, ta koperá tremendamente ku e organisashon pa hasi e evento aki posibel.

Fundashon Birgen di Rosario ta un organisashon ku ya pa 80 aña ta duna kuido den tur forma na nos hendenan grandi. E fundashon ta konsistí di 5 kas, kualnan ta Richardushuis, Nos Lanterno, Habaai, Klooster Alverna i tambe Pasadia Mi Amparo. En total ta duna kuido na mas ku 400 hende grandi, ku ta kantidat konsiderabel. Na Fundashon Birgen di Rosario tin 250 trahadó ta laborá, kada un ta un profeshonal riba su tereno.

KIKO LO HASI KU E REKOUDASHON ?

E meta di e fundraising aki ta pa yuda e fundashon ku tin hopi nesesidat.Ku e ganashi Fundashon Birgen di Rosario ta deseá na kumpra materialnan i aparatonan di uzo ku ta sumamente nesesario pa sigui duna e kuido na e hende grandi. Dia pa dia e hende grandi tin nesesidat di mas kuido; nan tin mester di stul pa baña, ròlstul, left pa saka nan for di kama i pone nan bèk den kama, rollator, etsetera. Tur esaki ta kosta hopi sèn.

Ku kompra di e materialnan nesesario pa nos grandinan, sigur ta aliviá e trabou di e personal. E personal ta duna kuido ku amor, apesar ku esaki ta birando hopi pisá. Grupo Galé ta hopi gustá bou di nos amantenan di salsa. Esaki ta un tremendo oportunidat pa baila e kantikanan tan gustá, den un ambiente amigabel. Ademas di baila, gosa i pasa bon na un sitio agradabel, bo ta kopera ku un bon kousa. Ademas ku bo karchi, bo ta partisipa na e rifa di premio pa porta, ku lo ta un pasashi pa Medellin.

ENTRADA

Entrada general ta 85 florin i VIP ta 800 florin (mesa pa 4 persona). VIP ta inkluí mesa i stul pa 4 persona, 1 lugá di parker, 1 bòter di bibida. No ta bende karchi VIP lòs. Pa informashon di VIP por yama 561-0222. Persona di kontakto Fundashon Birgen di Rosario: Jurina Constancia 561-0222

Karchi ta optenibel na tur nos kasnan di kuido; Huize Welgelegen (Habaai), Nos Lanterno, Richardushuis i Klooster Alverna, Mensing’s Caminada i 24 uur uit de muur.

Fundashon Birgen di Rosario ta gradisi tur instansia i persona ku ta kopera pa hasi e  fundraising posibel.