Renobacion edificio biblioteca na Playa casi cla

Actulmente DOW ta verf e edificio di biblioteca na Playa tanto pafo como paden. Esaki ta casi cla. Danki na curador sr. Renwick Heronimo pa e escohencia di color atractivo cu ta representa e bunita colornan di Aruba su barancanan y piedranan. Artista Robby Solognier a haci un bunita trabou riba muraya di biblioteca. Robby ta un empleado creativo di Biblioteca Nacional Aruba cu a percura cu e aña escolar nobo biblioteca tin un otro cara. Biblioteca a haya bentana- y portanan di aluminium nobo. Actualmente ta drecha e dak na e parti di e entrada. Na biblioteca nan ta contento cu e proyecto grandi ta casi cla. Falta algun detaye ainda pero e ta bayendo bon.

 

Un aña escolar nobo

Biblioteca ta haci un apelacion na tur su miembronan, studiante y alumno di scol cu a fia buki na biblioteca pa entrega esakinan. Nos ta na cuminsamento di un otro aña escolar y biblioteca ta pidi tur su miembronan pa hiba bukinan bek cu a fia, pa asina por ofrece esakinan na otro miembro pa e aña escolar 2023-2024. Asina nos tur por disfruta di e coleccion, circula y lesa e bukinan. Biblioteca no ta cobrando boet actualmente y ta habri di dialuna pa diabierna. Miembronan hoben y adulto por fia 4 buki pa un luna largo!

Miembrecia gratis pa tur mucha y hoben

 

Nos a introduci miembrecia gratis na 2023 pa tur mucha y hoben bou 18 aña. Nos ta invita bo bin biblioteca cu bo yiu, sobrina, primo y haci nan miembro di biblioteca! Pakico? Pa tur mucha y hoben por explora un coleccion grandi di storia y buki riba tur topico of lesa revista. Banda di e coleccion na biblioteca, nos ta ofrece tambe un coleccion di buki Ebooks y Audiobooks. Tin hopi espacio pa traha riba computer, busca informacion riba Internet y ademas tin WIFI pa por usa bo Smartphone, tablet y laptop. Mucha y hoben ta bon bini pa traha riba tarea di scol sea individual of den grupo. Pa registra como miembro por fabor trece un ID valido.