Petishon pa reunion di Komishon Sentral pa deliberá riba e tópiko di entrega lat di e presupuesto 2024 .

REDAKSHON August 23, 2023 0 Comments

Na: Presidente di Parlamento di Kòrsou

Sra. Ch. America-Francisca

Wilhelminaplein 4

Presente

Willemstad, 22 ougùstùs 2023

Tópiko: Petishon pa reunion di Komishon Sentral pa deliberá riba e tópiko di entrega lat di e presupuesto 2024 .

Apresiabel Sra. America-Francisca,

Nos a tuma nota ku minister di Finansa a manda un karta pa pidi Parlamento pa dun’é aprobashon pa por entrega e presupuesto 2024, 8 siman mas lat ku apertura di e aña parlamentario. E motibu ku Minister di Finansa ta duna ta, ku e negosiashonnan ku Ulanda tokante di e refinansiamentu di e fiansanan di Covid-19 i e fiansa pa por atendé e problemátika di Ennia, no a yega ainda na un resultado final i ku e ta spera ku nan lo por ta kla pa final di sèptèmber pa asina por presentá e presupuesto dia 6 di novèmber.

Esaki lo ta despues di e di dos djamars den sèptèmber, dia 12 sèptèmber, ku ta e dia di apertura di aña parlamentario, manera stipulá den nos Areglo di Estado i konforme e Lei di Komptabilidat. E karta ku e petishon di Minister di Finansa a yega parlamento dia 8 di ougùstùs i a trata e karta sin yega na un opinion komun riba e tópiko. A disidí ku lo manda e karta pa Komishon Sentral. Sinembargo e petishon pa reunion te ainda no a sali di e komishon.

E petishon aki ta inakseptabel pa Frakshon di PAR; e Minister di Finansa mester kumpli ku lei sin mas i buska otro solushon pa por solushoná e puntonan ku e ta menshoná den su karta. Frakshon di PAR komo frakshon responsabel ta sinti nos obligá na yama un reunion di Komishon Sentral riba e tópiko aki.

Mirando ku mester tin klaridat i un kontesta rápido pa minister di Finansa pa asina ei e por kumpli ku entrega di e presupuesto na tempu, esta dia 12 di sèptèmber, nos ta hasi uso di artíkulo 33 di Reglamento di Órden pa pidi un reunion di Komishon Sentral.

Nos ta spera ku presidente por yama e reunion aki ku karakter di urgensia pa asina pueblo di Kòrsou tambe por ta al tantu di kiko ta bai pasa dia 12 di sèptèmber benidero ora ku habri e aña parlamentario nobo.

Atentamente,

Frakshon di PAR