BISHITA DI TRABOU NA HULANDA RELASHONÁ KU DIFERENTE PROYEKTO PA HALSA KALIDAT DI APARATO PÚBLIKO

WILLEMSTAD – Resientemente Minister di Gobernashon, Planifikashon i Servisio Públiko di Kòrsou (BPD), señor Ornelio “Kid” Martina, tabata di bishita na Hulanda. Aki e la reuní ku diferente entidat gubernamental i semi gubernamental tokante di dos tema ku ta “Sirbi i Digitalisashon”.

Den kuadro di landspakket i VFO (Verbeteren Functioneren Overheid), Minister Martina a hasi eskoho di 2 trayekto ku tin su prioridat, esakinan ta ‘interne en externe’ dienstverlening (sirbi komunidat i sirbi klientenan interno) i tambe Digitalisashon. E dos proyektonan grandi akí ta kana huntu ku otro, esun no por kana sin e otro. Minister Martina a interkambiá di idea tambe tokante topkader di gobièrnu (kuadro di maneho riba nivel haltu).

Durante diferente reunion na entre otro VNG (Vereniging Nederlandse Gemeenten / Asosashon di munisipio na Hulanda) a palabrá ku lo bai traha mas intenso huntu pa halsa kalidat di servisio na komunidat i tambe na nos ámtenarnan interno. Tur esaki den kombinashon ku digitalisashon. Minister Martina a haña un rekorido na e munisipio di Amersfoort ku ta dispuesto di duna nan aporte den interkambio di konosementu. Na e munisipio akí por a mira kon nan departamento di duna servisio na públiko i tambe servisio interno ta funshoná.

Ku e bishita akí Minister BPD a tuma nota di diferente forma pa mehorá funshonamentu, i tambe dal un paso mas den su afan pa halsa kalidat di e aparato públiko.

Informatie Voorziening Amersfoort

SSC-ICT (Shared Service Center- ITC) Rijksoverheid, Den Haag