Minister Shalten Hato KOLABORASHON RIBA TERENO HUDISIAL ENTRE ISLANAN DEN REINO HULANDES I SÜRNAM

Aktualmente Minister Hato ta na Sürnam riba invitashon di Minister di Hustisia Surnameo, sr. Amoksie huntu ku Minister di Hustisia i Asuntunan Sosial di Aruba, sr. Tjon i Minister di Hustisia di Sint Maarten, sra. Richardson. Den un afan pa intensifiká seguridat públiko Minister Hato ta partisipá na e biahe di trabou aki pa sera algun akuerdo konkreto pa intensivá kolaborashon stratégiko den e kadena hudisial.
Segun Minister Hato ta unikamente dor di kolaborá huntu ku partnernan den Reino i den besindario nos por uza ‘’best practices’’ pa sirbi nos komunidatnan aún mas mihó. Mirando similaridatnan den oportunidat i menasanan den e paisnan den Reino ta mas ku lógiko pa traha huntu pa kombatí kriminalidat.
Den e biahe di trabou na Sürnam Minister Hato lo trata topikonan manera regisor di bario, kriminalidat ku ta mina, proyektonan di resosialisahon di personanan enkarasela, proyekto di kamara i maneho regardando indokumentado.
E biahe di trabou lo kontené adishonalmente bishitanan na entre otro Opa Doeli (sentro penitensiario pa hóben), departamentu di krímen pisa, akademia di polis, prizòn Santo Boma, Korte di Hustisia, Ministerio Públiko, Minister di Asuntunan Eksterior i tambe bishita na e presidente Surnameo. E meta di e biahe aki ta pa firma un letter of intent pa intensivá koperashon den e kadena hudisial entre e kuater paisnan.