3 di sèptèmber despues di Kaya Kaya Festival FUNDASHON SER’I OTROBANDA TA ORGANISÁ “SAKA RATON”
3 di sèptèmber despues di Kaya Kaya Festival
FUNDASHON SER’I OTROBANDA TA ORGANISÁ “SAKA RATON”
Willemstad – Fundashon Ser’i Otrobanda (FSO) ta organisá pa promé bes e evento “Saka Raton” riba 3 di sèptèmber 2023 di 4’or di atardi pa 9’or di anochi. E fiesta aki ta tuma lugá e djadumingu despues di Kaya Kaya Festival di 2 di sèptèmber awor. Djadumingu Fundashon Ser’i Otrobanda ta selebrá su di 10 aña ku tur habitante di e bario. Kaya Kaya Saka Raton ta un kolaborashon entre Fundashon Kaya Kaya i FSO. Kaya Kaya Saka Raton ta un fiesta spesialmente dediká na habitantenan di Ser’i Otrobanda disfrutá huntu ku nan famia, sernan kerí i amigunan.
E evento aki lo tumá lugá na Ser’i Otrobanda den e siguiente kayanan: Ferdinandstraat, Willemstraat, Frederikstraat, Emmastraat, Ijzerstraat i plenchi Augusto Fraai. Lo bai tin programa spesial pa mucha i hóbennan na enkargo di Excel Arts Academy. Tambe lo tin músika di DJ, Típiko, Kaha di Òrgel i algun banda konosí. Lo tin un bar surtí (benta ku token) i kos di kome prepará pa habitantenan mes (kèsh). Diferente Kas di Arte ku a partisipá na Kaya Kaya lo ta habrí pa duna oportunidat na habitante i bishitantenan di Kaya Kaya Saka Raton atmirá nan arte. I e restorantnan den e bario tambe lo ta habri pa ofresé nan menú. E evento lo ta kompletamente grátis. Kòrda bini ku sèn efektivo pa kumpra kuminda serka nos habitantenan i uso di tualèt.
E aña aki Fundashon Ser’i Otrobanda ta selebrando su di 10 aña di eksistensia. Durante e 10 añanan aki FSO a trèk i kontribuí na desaroyo di Ser’i Otrobanda, ku enfoke spesial riba limpiesa, seguridat, kombibensia, aktividat pa hóben i hende grandi. Tambe tabatin diferente inisiativa pa stimulá desaroyo ekonómiko den e área, manera Casas Vivas kaminda a realisá e promé muralnan riba kasnan bandoná. E proyekto aki a marka inisio di rutanan di arte i kaminata dor di e área, kaminda turista i bishitantenan a kuminsá deskubrí e área ku awor ta un bario hopi atraktivo i limpi. Pa su hòfinan den bario FSO a sali den e 10 finalistanan pa e premio di Appeltje van Oranje sperando ku den òktober por gana e premio mayor den Reino Hulandes.
E logro mas remarkabel di FSO ta Kaya Kaya mes, kaminda èks presidente di FSO, Kurt Schoop, a inisiá e promé edishon siendo den FSO ainda. Pa motibu di e éksito i akohida di e festival, señor Schoop a disidí di sali for di FSO i bai dediká mas tempu na e festival. Ku organisashon di “Saka Raton” djadumingu awor 3 di sèptèmber, FSO ta duna kontenido na e koperashon ku Kaya Kaya, klousurando un siman di arte, músika i selebrashon, huntu ku pueblo di Kòrsou i habitantenan di nos dushi bario i nan famia, sernan kerí i amigunan.