SUGERENSHA PA BAHA PREIS DI KORIENTE TIN KOMPRENSHON DI PARTI DI AQUALECTRA PERO BAL TENE NA KONSIDERASHON ALGUN PUNTO
SUGERENSHA PA BAHA PREIS DI KORIENTE TIN KOMPRENSHON DI PARTI DI AQUALECTRA PERO BAL TENE NA KONSIDERASHON ALGUN PUNTO
Willemstad 30 di ougùstùs 2023- Aqualectra a tuma nota di un proposishon pa baha preis di koriente pa asina komunidat por tin mas akseso na konsumo di koriente. Na promé lugá por parse un solushon interesante pa inventarisá i yuda aliviá nos komunidat di algu ku rònt mundu ta sinti su efekto. E situashon ta kousa un oumento di uso di koriente. Bal sin embargo, tuma na konsiderashon algun punto ora ta pensa den e direkshon aki pa aliviá tantu e kalor komo resibu di koriente mas haltu na fin di luna, debí na mas uso di koriente.
Oumento di demanda ta nifiká oumento di produkshon. Un oumento di produkshon no ta nifiká ku Aqualectra ta gana mas, pasó Aqualectra tin gastu adishonal pa por produsí mas koriente. Pa kolmo den e periodo aki no tin muchu bientu loke ta nifiká ku Aqualectra ta usando unidatnan di produkshon konvenshonal loke ta nifiká kosto di produkshon mas haltu ku si por a hasi uso di koriente produsí pa bientu. Si oumento di demanda bai kombiná ku un redukshon di preis e ta nifiká ku Aqualectra ta sobra aun ménos pa sigui invertí den produkshon, distribushon i mantenshon. Un redukshon di e preis lo tin e efekto ku ta stimulá e usuario pa usa mas koriente. Esaki por tin efekto nèt kontrali esta ku su kostonan ta oumentá debí ku e ta bai usa mas koriente.
Ta bon pa remarka tambe ku e preis di awa i koriente ta keda regulá pa Bureau Telecommunicatie en Post (BTP.) Den su stipulashon di preis e reguladó ta tene debido kuenta ku e preis di awa i koriente mester ta hustu pa tantu Aqualectra komo e konsumidó. E reguladó ta determiná kiko e kostonan di produkshon por ta i tambe kiko Aqualectra por gana den e preis pa por kubri invershonnan nesesario pa garantisá produkshon i distribushon di awa i koriente.
Aqualectra ta trahando pa asina den futuro serkano nos hasi mas uso di energia renobabel, ku ta mas barata i ta kontribuí na redusí e preis di koriente. Banda di esaki, pronto lo start ku atendementu muchu mas dirigí di awa i koriente ku no ta keda registrá, loke tambe lo tin su efektonan positivo riba e preis. Huntu ku esaki Aqualectra resientemente a start un kampaña pa informá komunidat riba maneranan pa usa awa i koriente konsiente. Loke sigur ta kontribuí na un resibu pagabel fin di luna. Aqualectra lo keda traha pa bienestar di komunidat i lo sigui hasi su máksimo esfuerso pa e koriente i awa ku nos ta usa ta mas pagabel i duradero posibel.
