Ta fortifiká resiliensia digital na Kòrsou i Boneiru Digicel Business a tene seminario tokante ‘Cyber Security’

Ta fortifiká resiliensia digital na Kòrsou i Boneiru

Digicel Business a tene seminario tokante ‘Cyber Security’

 

Willemstad– Resientemente Digicel Business, un kompania lider di telekomunikashon i provedor di teknologia tabata anfitrion di un seminario tokante Cyber Security den kolaborashon ku Digicel Business Protect Team bou liderazgo di Bryan Kane, tambe Douglas Thomas, Direktor di Advanced Solutions, Cyber SOC i  Symptai Consulting, un kompania di cyber security lider den Caribe bou maneho di Rory Ebanks, Direktor di Cyber & Information Security -ku a resultá sumamente eksitoso! E evento a tuma lugá na Avila Beach Hotel i por a konta ku un grupo diverso di profeshonal for di diferente industria na Kòrsou i Boneiru ku tabata entusiasmá pa amplia nan konosementu riba atakenan sibernétiko i mehorá nan defensa digital.

E seminario tabatin komo meta pa empoderá negoshinan ku konosementu i hèrmèntnan importante pa nabegá e panorama sibernétiko ku ta kontinuamente den desaroyo. Den un mundu digital kresiente, e importansia di un maneho robusto di cyber security no por wòrdu lubidá sin mas. Partisipantenan di e seminario a risibí datonan importante den e último strategianan pa seguridat i defensa di nan organisashon kontra atakenan cyber.

Durante e seminario dia 30 di ougùstùs último, ekspertonan di Digicel Business Protect Team i Symptai Consulting a duna presentashonnan interaktivo riba un variedat amplio di tópiko, inkluyendo: tendensianan di Cyber Threat ku empresanan mester ta na altura di dje. Tambe strategianan efektivo pa seguridat di data sensitivo, ret i kon pa prevení atakenan cyber. A elaborá riba kon pa respondé efektivamente den kaso di un atake, kon pa mitigá e impakto i rekuperá. E importansia di train personal di empresa i a eksplorá e tendensianan ku awendia ta lantando kabes i nan impakto riba seguridat sibernétiko.

Gavin Jones, Direktor di Digicel Business ABC, a ekspresá su entusiasmo pa e éksito di e seminario bisando, “Nos ta kontentu di mira un partisipashon asina grandi for di komunidat empresarial na Kòrsou i di Boneiru. E seminario aki ta suprayá nos kompromiso pa empoderá organisashonnan ku konosementu i rekurso ku nan mester pa nabegá e panorama sibernétiko bastante kompliká. Dor di kolaborá ku ekspertonan manera Symptai, nos ta sigurá ku negoshinan ta ekipá pa protehá nan biennan digital i mantené kontinuidat operashonal.”

E evento a konkluí ku un lùnch na unda partisipantenan tabatin e oportunidat pa kombersá direktamente ku ekspertonan, i haña konseho pa nan negoshi spesífiko i nètwèrk ku koleganan den industria.