Pago di restitushon tin debido atenshon di minister di Finansa.

Minister Javier Silvania

Komunikado di prensa – 6 september 2023
Pago di restitushon tin debido atenshon di minister di Finansa.
Minister di Finansa ta reuni regularmente ku hefe di servisio di impuesto pa atende ponementu di aanslag pa inkomstenbelasting i pago di restitushon.
E momento di trata bo deklarashon no ta dependé (solamente) di e momento di entrega di bo deklarashon. Esei tabata e kaso den pasado (drenta promé – sali promé). Si bo deklarashon por wòrdu kontrolá dor di e sistema, e ora’ei kisas bo por risibí bo restitushon denter di 1 luna despues di entregá bo deklarashon. Si bo deklarashon ta robes yená òf si tin un otro motibu ku bo deklarashon mester wòrdu kontrolá manualmente pa un empleado, por dura vários luna promé ku bo risibí bo restitushon. Tur siman ta trata mas o ménos 600 deklarashon manualmente, paralelo na e proseso outomatisá. Esaki ta konta tambe pa e tratamentu di deklarashonnan di añanan anterior (2018-2021). E pago di restitushon tambe ta un proseso kontinuo.
Ademas di e kontrol di deklarashonnan di impuesto riba entrada, tur siman ta trata mas o ménos 200 petishon di opheshon di impuesto (bezwaarschriften) riba entrada.
Ta i lo implementá diferente akshon di mehorashon den e próksimo periodo pa por outomatisá i atendé un parti mas grandi di deklarashonnan di impuesto riba entrada mas lihé posibel.