SIMAN DI KULTURA 2023

Pueblo di Kòrsou ta selebrá Siman di Kultura 2023, di 24 di sèptèmber 2023 pa 3 di òktober 2023 komo antesala pa selebrá rehabilitashon di nos Héroe Nashonal Tula i su kompañeronan.

WILLEMSTAD,- Gobièrnu di Kòrsou ta partisipá na pueblo di Kòrsou ku Siman di Kultura 2023 e aña akí ta di 24 di sèptèmber pa 3 di òktober 2023. Dia 3 di òktober ta fecha ku Gobièrnu Hulandes ta bai rehabilitá nos Héroe Nashonal Tula. Gobièrnu di Kòrsou a dekretá un Aña di Konmemorashon Abolishon di Sklabitut ku ta for di 1 di yüli 2023 te ku 1 di yüli 2024 i p’esei Siman di Kultura 2023 ta keda dediká na konmemorá 160 aña di Abolishon di Sklabitut. Ku e lema pa e siman di Kultura: Lasonan Fuerte pa un futuro briante, Kòrsou ta enfoká riba Libertat, Igualdat i Franternidat. Tur esaki komo antesala den kuadro di rehabilitashon di Tula.

Siman di Kultura ta un antesala pa konsientisá pueblo di e akto importante di e rehabilitashon di Tula i ta gosa di aktividatnan tantu dirihí pa pueblo di Kòrsou i turistanan Nos historia ta konta ku 160 aña pasá ofisialmente sklabitut a keda abolí, a marka un punto di kambio den e historia di Karibe i Mundu. Esaki a nifiká e final di un periodo skur di opreshon humano i eksplotashon, pero tambe a laga un herensia duradero ku ainda bo por sinti su efektonan den nos kultura i komunidat. Tur esaki ta pone lus riba e balentia di nos Héroe Nashonal i su kompañeronan. Nos Pueblo ta gosa di un herensia riku ku ta keda manifestá den nos kultura. P’esei den Siman di Kultura nos ta selebrá huntu i krea lasonan fuerte pa un futuro briante pa nos Pueblo. Komo pueblo nos mester realisá ku huntu nos ta logra muchu mas ku di forma individual. Pa e motibu akí ta masha importante pa forma lasonan di hermandat. Siman di Kultura ta un momentu den aña ku nos ta hasi diferente aktividat huntu i sera konosí ku nos mes talentonan i potensial pero tambe esun di e otro. Interaktando ku otro nos ta fortifiká nos lasonan di hermandat ku otro. Mas tantu nos uni den nos metanan komun mas resultado nos lo tin komo pueblo.

Lema pa Siman di Kultura 2023: Lasonan Fuerte Pa un Futuro Briante
Tema pa Siman di Kultura 2023: Komo Siman di Kultura ta e antesala di rehabilitashon di Tula e tema di e aña aki ta lokual ku nos héroe nashonal a lucha p’e ku ta: Libertat, Igualdat i Fraternidat

Deskripshon di Tema: E palabranan akí, Libertat, Igualdat i Fraternidat, Tula, lider máksimo di e lucha pa libertat di 1795, a dirihí na Pader Jacobus Schink. E kousa prinsipal di e lucha di 1795 tabata e deseo persistente pa libertat ku tabata biba den kurason di tur esnan sklabisá. Un anhelo asina profundo ku nan tabata dispuesto pa duna na bida p’e kousa di libertat. For di e tempu ei, pasando di generashon pa generashon nos pueblo a konosé hopi kambio pero ainda nos ta den e lucha pa Libertat, Igualdat i Fraternidat.
Sektor di Kultura i Deporte lo traha huntu ku Plataforma Sklabitut i Herensia di Sklabitut pa ekspertonan di e Plataforma trese nan konosementu pa pueblo di Kòrsou i tambe duna splikashon di e rehabilitashon di Tula. Meta di

Siman di Kultura pa Pueblo di Kòrsou ta pa fomentá un komunidat vibrante i inklusivo, pa medio di reuní diferente gremio den nos komunidat huntu. I Asina krea konekshonnan ku balornan manera rèspèt mutuo, komprenshon pa otro, redusí prehuisio, reforsá un sintimentu di identidat kolektivo i stimulá interkambio entre nos.
Gobièrnu di Kòrsou ta hasi un yamada na pueblo pa durante di e siman akí pueblo yuda duna kontenido na Siman di Kultura poniendo atenshon riba edukashon i partisipashon kultural ku enfoke riba e balornan ku nos héroe Nashonal a siña nos. Tur esaki den un ambiente positivo ku otro, hasiendo traspaso di konosementu riba nos historia i kultura, nos tradishonnan i formanan di arte, pa asina nos preservá esakinan pa generashonnan futuro.

Siman di Kultura ku un programa variá:

– Tayernan ku ta pone enfoke riba nos Kultura;
– Konferenshanan i presentashonan kultural;
– Aktividatnan interaktivo riba diferente aspekto di nos kultura ku por tuma lugá den skolnan;
– Bario i Sentronan di Bario, na ofisinanan, den kasnan di kuido;
– Riba plenchinan i sentronan kultural;
– Artistanan den tur ramo di arte;
– Sentronan Pre Eskolar, Skol i aktividatnan despues di skol;
– Hóbennan di Kòrsou i Klup di damas;
– Organisashonnan Gubernamental i No gubernamental;
– Organisashonnan Kultural, Organisashonnan di Deporte;
– Institutonan intramural ( Manera Prison, GOG, Kas di Grandinan etc etc);
– Kompanianan, hotèlnan i tur ku ta sinti nan yamá pa partisipá.

Den poko palabra henter pueblo di Kòrsou!

Pa duna sosten na esaki Gobièrnu di Kòrsou ta registrá tur gruponan kultural, personanan, artistanan i instansianan ku ke duna un aporte na Siman di Kultura. Manda bo informashon pa Sektor di Kultura i Deporte na koreo-elektróniko simandikultura2023@gmail.com. Si bo ke mas informashon tokante di Siman di Kultura 2023 òf ku bo ke kompartí un programa ku nos, por tuma kontakto ku nos via WhatsApp na number di telefòn 5999 567-7369/+5999 566-7369 òf por manda un koreo-elektróniko.

Siman di Kultura di 24 di sèptèmber pa 3 di Òktober 2023
Lasonan Fuerte Pa un Futuro Briante ku enfoke riba Libertat, Igualdat i Fraternidat

 

Logo i Diskripshon di Siman di Kultura pa aña 2023: E logo di Siman di Kultura e aña akí a keda kreá pa Fantasy Arts. Aki ta sigui un deskripshon di e logo pa Siman di Kultura 2023.
– E man di lucha pa libertat ku e kadena di libertat fuertemente tené ku ta drenta den e faha hel di nos Bandera ta simbolisá rehabilitashon di Tula;
– E parti ku ta karga forma di Kòrsou ta nifiká fundeshi pa kurashi di lucha pa desaroyo;
– E rayonan di lus ku ta bria i e famia/komunidat di Kòrsou ku kara na laira ta nifiká perspektiva i desaroyo kontínuo pa un futuro briante;
– E dos flechanan den moveshon ta nifiká generashonnan ku ta sigui karga nos historia i kultura den futuro.