“Dive operators” ta risibí remedi ku mester apliká riba koral pa kombatí malesa

“Dive operators” ta risibí remedi ku mester apliká riba koral pa kombatí malesa

Willemstad – Ministerio di GMN resientemente a organisá un enkuentro ku tur “dive operators” di Kòrsou pa sigui elaborá i risibí instrukshon konkreto kon pa atendé ku e mas resien malesa di koralnan den Karibe, Stony Coral Tissue Loss Disease. Ministerio di GMN a bini ta informá komunidat kaba di e malesa aki i a publiká momentu ku Minister Pisas a bai sambuyá pa e mes tuma nota di e situashon di atenshon aki riba kual Minister a tuma akshon tambe. Durante e enkuentro aki dr. Mark Vermeij un bes mas a mustra “dive operators” den detaye kon mester apliká e remedi pa kombatí e malesa aki i tambe kon distinguí e malesa nobo for di otro malesanan.

Tabatin 10 “dive operator” presente i na final di e enkuentro nan a registrá pá risibí e remedi Antibioticum amoxicilline i un spuit kual nan lo bai uza momentunan ku nan bai sambuyá. E remedi ta konsistí di un puiru i un pasta Base 2b ku mester wòrdu mesklá. Mester yena e meskla aki den un spuit i bou di awa mester spuit e remedi riba partinan afektá di e koral i hunta esaki ku dede alrededor di e parti afektá. No ta un tarea fásil, pero “dive operators” ta kolaborá ku esaki pasobra koralnan sano ta di sumo importansha pa nan industria.

Ta bai organisá un enkuentro ku un último grupo mas di “dive operators” i asina por konkluí ku tur a risibí e remedi. Koralnan ku tin e malesa aki por mira esaki na e manchanan blanku ku ta aparesé riba e koral. Minister Pisas a tuma nota di e konsekuenshanan ku e malesa aki por tin pa Kòrsou i a tuma akshon rápido. Koralnan sano ta importante pa nos industria di buseo, pero tambe di sumo importansha pa eksistensha di un kantidat di piskánan ku nos ta konsumí. Ministerio di GMN lo sigui informá komunidat di e akshonnan ku ta tumando pa atendé ku e problemátika aki.