Pa stimulá kooperashon regional riba tereno di komunikashon CBCS a organisá e promé Regional Central Bank Communication Workshop

Pa stimulá kooperashon regional riba tereno di komunikashon
CBCS a organisá e promé Regional Central Bank Communication Workshop

WILLEMSTAD/PHILIPSBURG — Segun ku e bankonan sentral di nos region ta desaroyá pa ta
ménos tradishonal i ‘será’ pa un instituto mas aksesibel i transparente, e profeshonalnan di
komunikashon na tur e diferente institutonan akí ta enfrentá e mesun tipo di retonan. P’esei,
kooperashon riba tereno di komunikashon ta asina importante den nos region. Esei tabata un di e
konklushonnan importante di e ‘1st Regional Central Bank Communication Workshop’, organisá di
13 pa 15 di sèptèmber último na Kòrsou. E tayer akí, titulá ‘Transitioning into a New Era of Central
Banking Communications in the Caribbean’ tabata un inisiativa di Centrale Bank van Curaçao en
Sint Maarten (CBCS). Vários profeshonal di komunikashon di banko sentral regional i internashonal
tabata di bishita riba nos isla pa e tayer di tres dia akí.
Presidente di CBCS, Richard Doornbosch, tabata enkargá ku e apertura ofisial, siguí pa David-Jan
Jansen (De Nederlandsche Bank), kende a ranka sali komo un di e oradónan prinsipal ku su
presentashon ‘Communication and Transparency in Central Banks: research & practice’
(Komunikashon i transparensia di banko sentral, segun investigashon i den práktika). Jansen a
enfatisá e importansia di komuniká ku públiko en general. Thierry Bangratz & Petr Jakubik
(IMF/CARTAC) a elaborá, respektivamente, riba komunikashon for di perspektiva di supervishon i
komunikashon tokante stabilidat finansiero. David Hofman (IMF) a enfoká riba evolushon di
komunikashon for di perspektiva di maneho monetario. Paul Badertscher (Bank of Canada) a duna
un presentashon riba transformashon di komunikashon na banko sentral di Canada. Komo oradó
i invitado spesial, Volodymyr Lepushynskyi (National Bank of Ukraine), a bini Kòrsou for di e zona
di guera i a duna un presentashon riba e tema di maneho monetario den tempu di krísis i
komunikashon al respekto, ku algun ehèmpel resien di banko sentral di Ukrania.
Ademas di e oradónan prinsipal, algun ehèmpel real di diferente isla a keda presentá pa Bank of
Jamaica, Central Bank of Barbados, Central Bank of Trinidad & Tobago, Eastern Caribbean Central
Bank i CBCS. Nancy Guttenberg-van der Wal, Hefe di Corporate Communications di CBCS, a trese
padilanti ku: ‘Un banko sentral ta un entidat públiko. Komo tal, e tin ku buska un bon balansa. Di
un banda, e mester mantené su identidat komo entidat reguladó responsabel den transformashon
pa un instituto mas transparente i aksesibel i, na mes momento, e mester keda aktual i komuniká
na un manera ku komunidat por komprondé’. Marek Petruš, un konsehero internashonal riba
komunikashon, spesialisá riba tereno di banko sentral, a aktua komo moderadó di e konferensia.
Tambe, Petruš a presentá un introdukshon titulá ‘Enhancing transparency and communications:
Present-day challenges (& opportunities) in the Caribbean’.
E demas partisipantenan na e tayer tabata Centrale Bank van Aruba, Centrale Bank van Suriname,
The Central Bank of the Bahamas i The Central Bank of Belize. Durante e tayer, ku e partisipantenan
ta konsiderá unu sumamente eksitoso, e bankonan sentral partisipante a establesé un ret ofisial di
komunikashon. CBCS ta spera ku e tayer akí lo ta inisio di un tradishon duradero i ku, den futuro,
kada bes un otro banko sentral lo tuma organisashon di e evento na su enkargo.
Willemstad, 22 di sèptèmber 2023
CENTRALE BANK VAN CURAÇAO EN SINT MAARTEN