KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

Minister Shalten Hato DIA MUNDIAL MARÍTIMO

Ayera Minister di Hustisia, mr. Shalten Hato den representashon di Minister Charles Cooper di VVRP a hasi akto di presensia na seremonia pa konmemorá Dia Mundial Marítimo bou di e tema “MARPOL at 50, nos kompromiso ta kontinuá.”
E tema aki ta reflehá e historia largu di e organisashon protegiendo nos medio ambiente for di e impakto di aktividatnan marítimo, pa medio di un sistema fuerte i rigoroso di kòntròl i ta enfatisá e dedikashon kontinuo pa ku e trabou importante aki.
Riba e dia aki a pone atenshon riba e Konvenshon Internashonal pa Prevení Polushon marítimo, konosí komo MARPOL, ku a wòrdu establesé 50 aña pasá. MARPOL a hunga un papel fundamental pa protehé nos oséano i lamannan for di e efektonan negativo di aktividatnan di marítimo.
E propósito prinsipal di MARPOL ta klaro i ta enfoká riba prevenshon di polushom marítimo.
Pa logra esaki mester tuma algun stap manera entre otro:
• Purba redusí polushon di nos marina dor di prevení i ta prepará pa derame di zeta i polushon dor di supstansianan peligroso;
• Bini ku mas kampaña di konsientisashon pa eduká i krea e dedikashon den nos komunidat marítimo;
• Training, seminario i inisiativanan pa kontinuamente sigui eduká pa asina sigui kumpli ku e regulashonnan vigente.
Pa logra e metanan ambisioso aki, MARPOL ta enfatisá e proseso di sigui amplia konosementu i sabiduria mediante inisiativanan manera programanan di entrenamentu, seminarionan, i esfuersonan konhunto pa mehorá nos konosementu enkuanto e reglanan i pa sigurá nan implementashon efektivo.
Organisashon Marítimo Mundial (IMO) ta na vanguardia di e esfuersonan aki, fomentando kooperashon, establesiendo stándarnan i brindando un plataforma pa paisnan kolaborá pa por yega na práktikanan marítimo mas limpi i obtenibel.
Miéntras nos ta marka e Dia Marítimo Mundial aki i selebrá e 50 aña di éksito di MARPOL, laga nos afirmá nos kompromiso pa protehé nos oséano i lamannan pa generashonnan ku lo sigui.

Leave a Reply

This site uses Akismet to reduce spam. Learn how your comment data is processed.