A rekomendá Elizabeth de Cuba komo miembro di Kolegio di supervishon finansiero di Kòrsou i Sint Maarten
A rekomendá Elizabeth de Cuba komo miembro di Kolegio di supervishon finansiero di Kòrsou i Sint Maarten
Willemstad/Den Haag – Konseho di Minister di Reino a bai di akuerdo ku e rekomendashon di Kòrsou pa nombra señora J.E. (Elizabeth) de Cuba komo miembro di Kolegio di supervishon finansiero di Kòrsou i Sint Maarten (Cft).
Elizabeth de Cuba a nase i krese na Aruba i for di 2010 e ta biba na Kòrsou. Despues di a terminá su Maestria den Economics & Business na Universidat Erasmus na Rotterdam i su estudio di ouditor (registeraccountant), señora De Cuba a traha durante vários aña komo direktor di ouditoria den e departamentu di assurance di EY Dutch Caribbean. Ei el a sirbi diferente kliente lokal i internashonal, inkluyendo vários institushon finansiero.
Di 2017 te 2022, señora De Cuba, ku entre tanto a bira direktor asosiá (associate director), a traha den e Professional Practice Group di EY Caribbean. Den esaki e tabata ko-responsabel pa entre otro maneho di kalidat. Den e funshon aki el a traha estrechamente ku ouditornan di entre otro Trinidat & Tobago, Jamaica, Barbados, Saint Lucia i Surnam. Señora De Cuba entre 2018 i 2020 tabata dosente tambe di e materia Auditing na University of Curaçao, ku el a duna na e studiantenan ku tabata sigui e programa di Master den Accountancy & Controlling. Aktualmente e tin su propio empresa ku ta brinda servisionan riba tereno di Accounting, Auditing i Finance.
Nombramento di señora Elizabeth de Cuba komo miembro di Cft ta drenta na vigor riba 1 di òktober 2023. Asina e ta sigui señor Gregory Damoen ku tabata miembro di Cft pa Kòrsou durante dos término for di aña 2017.
Señora Lidewijde Ongering ta deklará ku e ta entusiasmá ku e ta bai traha ku señora Elizabeth de Cuba: “E tin un formashon sólido den e materia. Esaki ta mas ku bon biní”.
Ademas di su presidente señora Lidewijde Ongering, aktualmente Kolegio di supervishon finansiero di Kòrsou i Sint Maarten ta konsistí di señor Hans Hoogervorst (miembro riba proposishon di Hulanda), señora Julisa Frans (miembro riba proposishon di Sint Maarten) i e miembro saliente (miembro riba proposishon di Kòrsou) Gregory Damoen. Na luna di òktober próksimo Cft lo hasi bishita na Kòrsou i Sint Maarten pa promé biaha den su konstelashon nobo.