SOAW lo ehekutá plan stratégiko huntu ku UNICEF Ulanda tokante Edukashon Positivo.

 

 

Willemstad – Sektor di Famia i Hubentut di ministerio di Desaroyo Sosial, Labor i Bienestar, ta enkargá ku ehekushon i implementashon di e Tratado pa Derechinan di mucha i e Plan Nashonal kontra di Violensia relashonal i violensia kontra di mucha i hóben. Den kolaborashon ku UNICEF Ulanda, resien a kuminsá un trayekto pa inventarisá e sorto di intervenshon di guia i yudansa pa mayornan ku instansianan di Kòrsou ta duna na nos mayornan ku tin e nesesidat òf ku ta deseá di haña sosten kon pa eduká nan yu(nan) mas mihó. Den e trayekto aki a hasi diferente seshon konsistiendo di diferente instansia gubernamental i no gubernamental. Abase di e resultado di e inventarisashon a traha un plan di trabou ku ta konsistí di diferente aktividat.

A lanta un komishon, ta bai desaroyá un vishon i un ‘mapa sosial’. Tambe lo bai hasi un investigashon den kua lo bai aserká diferente organisashon i personanan den komunidat. E meta prinsipal ta pa yega na un intervenshon pa lanta/eduká yu positivamente ku ta sientífikamente pruebá i ku ta kuadra ku nos kultura.

 

E investigashon bou di guia di Dr. Everold Hosein lo tumá lugá di 29 di sèptèmber 2023 te ku 4 di òktober 2023. Señor Everold Hosein ta un eksperto riba tereno di komunikashon stratégiko. Promé ku start ku e investigashon lo tin un grupo di profeshonal ku lo sigui un training serka señor Everold Hosein di e método di COMBI (“Communication for Behavioral Impact”)  ku lo bai keda apliká durante di e investigashon na momento ku profesional nan drenta den kontakto ku nos komunidat. E training lo tumá lugá di 25 pa 28 sèptèmber 2023.

 

Despues di e bishita di Dr. Hosein, Ministerio di Desaroyo Sosial Labor I Bienestar lo komuniká logronan di e bishita i tambe akshonnan ku lo ser tumá pa ku e plan stratégiko di guia pa mayor relashoná ku edukashon familiar di nan yu positivamente, pa asina tur mucha i hóben por lanta den un ambiente seif i sano.