ORV a entregá di diploma na 5 eksaminadó di reibeweis

ORV a entregá di diploma na 5 eksaminadó di reibeweis
WILLEMSTAD- Opledingsinstituut Rechtshandhaving & Veiligheidszorg (ORV) a entrega diploma na 5 eksaminadó di reibeweis (Rij-examinator) ku resientemente a terminá e Rij-Examinator Opleiding (REO) ku éksito. E entrega di diploma a tuma lugá di presensia di hopi invitadó, kolega-, dosente-, hefe- i famianan di e studiantenan. Durante un seremonia ku a tuma lugá djaweps 28 di sèptèmber, representante di Minister di Hustisia , sr. Rigo Thode, representante di Minister di Maneho di Gobernashon, Planifikashon i Servisio Publiko, sekretario general sr. Ivar Asjes, direktor di ORV sra. Alpha Falbru i hefe di initiële opleidingen interino sr. Djener Jansen a hiba palabra. Despues di e spichnan tabatin entrega di diploma dor di direktor di ORV sra. Falbru, den presensia di direktor di Kranshi i Departamentu di Reibeweis, sra. Haddocks i demas hefenan di ORV.
Studiantenan ku a pasa e estudio ku éksito ta Jerseline Castablanco, Jozef Matawi, Gerald Walle, Marwin Muzo i Rogemy Leonora. E eksaminadónan menshoná ta pendiente pa bai traha na e departamento di Reibeweis. E departamento ta disponé awor di mas kolaboradó pa yuda esnan aktual.
REO OPLEIDING
E estudio ‘Rij Examinator Opleiding (REO) a start ofishalmente dia 1 di dèsember na ORV. Seis studiante a start ku e opleiding ku dura algu mas ku 30 siman i e studiante tabata henter siman na ORV. 5 studiante a terminá e opleiding ku eksito. E opleiding tabata konsistí di 26 materia manera entre otro reibeweis, tráfiko, komunikashon, duna instrukshon, Strafrecht i otro leinan, integridat ets. Studiantenan di e klas a kore stage na Bureau Rijbewijzen durante di e opleiding.