A instalá “drijflijnen” na playanan di Kenepa Grandi i Chikí

A instalá “drijflijnen” na playanan di Kenepa Grandi i Chikí

Willemstad – Ministerio di Salubridat, Medio Ambiente i Naturalesa ta sigui ku “upgrading” di nos playanan. Minister di Asuntunan General enkargá ku Agrikultura, Medio Ambiente i Naturalesa señor Gilmar Pisas a pone komo prioridat pa drecha, renobá i instalá fasilidatnan na vários playa públiko na benefisio di piskadónan, pero tambe bishitantenan lokal i turista.  Na Playa Kenepa Grandi i Chikí ya kaba a pone palapa i awor Minister Pisas a pone mas atenshon pa e parti di seguridat di e usarionan.

Durante e fin di siman ku a pasa a instalá e asina yamá “drijflijnen” kual ta e kabuyanan ku bui ku ta drif den laman pa separá área di landamentu i trafikashon marítimo di manera ku personanan riba seadoo i/òf boto por mira esaki i pa asinan nan no drenta den e área asigná pa landa.  Tabata un operashon basta grandi kaminda señor Sigfried “Pipi” Constancia a keda enkargá ku e kordinashon den laman i señor Gerritson Doran a kordiná e operashon riba tera. Tur esaki den presensia di Minister Gilmar Pisas.

Minister Pisas a indiká kaba ku despues di playanan di Kenepa Grandi i Chikí, playa di Santa Cruz i di Caracasbaai ta na turno pa instalá e “drijflijnen”. Minister Pisas a indiká tambe ku lo keda informá komunidat di tur su akshonnan pa mehorá kalidat di nos playanan pa bishitante pero tambe pa piskadónan. Riba potrètnan por mira Minister Pisas i tur esnan ku a yuda ehekutá e proyekto aki.