DISKURSO MINISTER VVRP NA INISIO TRABOUNAN ‘EPIC AT THE BAYSIDE’

Felis atardi na tur presente.

Despues ku na luna di mart, e pèrmit di konstrukshon a wòrdu otorgá na “Bayside Development B.V” pa e proyekto “Epic at the Bayside” su promé fase, i awe nos ta akinan huntu pa duna inisio na e trabounan di konstrukshon.

E momentu aki ta marka e komienso di un biahe ku lo ta nada ménos ku legendario!

E hotèl luhoso aki no ta solamente un edifisio. Ta un kompromiso pa krea un paraiso Karibeño, un kompromiso pa ofresé lo mehor den hospitalidat i un kompromiso pa e futuro briante di nos industria turístiko.

Mi kier ekstendé palabranan di gratitut na tur esnan ku a forma parti di e grupo ku a kombertí e vishon aki den realidat.

For di e arkitektonan ku a diseñá e paraiso tropikal aki te na e trahadórnan dediká ku lo kompletá e demas trabounan nesesario.

Miéntras ku nos ta inougurá e proyekto aki awe, laga nos no lubidá ku e proyekto aki ta mas ku solamente konstrukshon di un hotèl; ta trata di krea un legádo Karibeño.

E hotèl luhoso na Piscadera Bay lo ta un lugá kaminda ku bishitantenan lo por relahá i disfrutá di e bunitesa ku nos isla ta brinda i di trankilidat lokal ku bista magnififiko riba laman.

Un danki na tur ku di un òf otro forma a pone nan granito pa realisashon di e bunita proyekto aki. Danki pa kere den Kòrsou.

Na nòmber di Minister Charles Cooper di VVRP mi ta deseá boso tur klase di éksito. PABIEN!!