KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

Minister Javier Silvania: DIRIGENTENAN DI SERVISIO DI IMPUESTO TA HAÑA TRAINING DI IMF

Minister Javier Silvania

KOMUNIKADO DI PRENSA
DIRIGENTENAN DI SERVISIO DI IMPUESTO TA HAÑA TRAINING DI IMF
Djabièrnè 20 di òktober Servisio di Impuesto lo kuminsá ku training di ‘TADAT’ pa tur dirigente. TADAT ta para pa ‘Tax Administration Diagnostic Assessment Tool’, na papiamentu ‘Hèrment di Evaluashon di Diagnóstiko di Atministrashon di Impuesto’. TADAT ta un di e mihó kuadronan den práktika pa funshonamentu di Servisio di Impuesto desaroyá pa IMF (Fondo Monetario Internashonal). E kuadro aki a ser kreá uzando e konosementu i ekperensia di servisionan di impuesto di rònt mundu i, pues, ta forma tambe e standart global ora ta trata di pone e fortalesa i debilidatnan di servisio di impuesto riba mapa.
Na novèmber 2021 a hasi un evaluashon di Servisio di Impuesto di Kòrsou basá riba e kuadro di TADAT aki. E evaluashon aki a mustra ku Servisio di Impuesto tin un ‘potensial grandi pa mehorashon’. Pa logra e mehorashonnan aki, a establesé ophetivonan operashonal pa Servisio di Impuesto pa 2022 i 2023. Esakinan ta ser raportá periódikamente na Minister di Finansa, Javier Silvania. Den e último dos añanan, ya a raportá hopi progreso, i klientenan lo sigui tuma nota di e mehorashonnan nesesario den e kalidat di servisio duná pa Servisio di Impuesto den e próksimo lunanan.
Pa logra un mihó funshonamentu di Servisio di Impuesto, ta importante pa e dirigentenan tin un bon idea di e faktornan di éksito di un servisio di impuesto. E solushon pa e problema di su departamentu por ta sintá den adaptashon di e método di trabou di un otro departamentu. Ta presis dor di duna e dirigentenan un idea di e funshonamentu di un servisio di impuesto en general, i dor di permití nan wak mas leu ku e murayanan di nan propio departamentu, ku nan mes lo por yega na identifiká inisiativanan di mehorashon. Asina, identifiká posibel mehorashonnan den nan mes organisashon ta un di e metanan di e training. E mehorashonnan aki por ta inkluí tambe den e ophetivonan di Servisio di Impuesto pa 2024.
Tur siman lo trata 2 di e 12 módulonan di e programa di IMF, i despues lo mester pasa un èksamen online pa evaluá e konosementu atkerí. Na final di pasa e èksamen ku éksito, e partisipante lo risibí un sertifikado di IMF. Organisashon di e training aki ta un elemento esensial pa oumentá e kalidat di servisio ku Servisio di Impuesto ta duna na su klientenan ainda mas.
639114718427035"
639114718427035"